Дьокуускай Кыайыы Паркатыгар сэрии оҕолоругар анаан үҥкүү киэһэтин ыыттылар

Сайыҥҥы чаҕылхай киэһэ Кыайыы паркатыгар дьон тоҕуоруһар сирэ. Бу сырыыга манна аҕам састаахтар муһуннулар. Ааспыт кэм ахтылҕаныгар олоҕурбут ырыалар, эргиллибэт эдэр саас муусуката дьиэрэйэн кэлбит дьон үҥкүүлээн дайда. Варавара Попова Тулагы Сыырдааҕын олохтооҕо аны күһүн 80 сааһын туолуоҕа. Варвара Николаевна үйэтин тухары оҕо саадыгар иитээччинэн үлэлээбитэ.

Варвара Попова, Тулагы олохтооҕо: «Бу паарканы көрүөх буолбуппут ыраатта. Элбэҕи көрүөхпут-истиэхпит, үҥкүүлүөхпүт, эдэр сааспытын эргитиэхпит».

Бу Кыайыы паркатыгар ретро-былассааканы Дьокуускай куорат общественнай палатата көҕүлээн ыытта. Ааспыт сылтан былааҥҥа туруоран, аҕам саастаахтары көҕүлүүр, кинилэри аралдьытар сыаллаах Кыайыы вальсын тэрийэр.

Бу иккис тэрээһин буолар, сыл устата маннык хабаанаах 80 тэрээһин ыытар соруктаахтар.

Саргылаана Феоктистова, Дьокуускай куорат общественнай палататын сэкэрэтээрэ: «Бу үчүгэй күннэри туһанан, таһырдьа таһааран. Кырдьаҕас дьон бэйэ бэйэлэрин көрсөн, кэпсэтэн, кыратык хамсанан ыллахтарына үөрүү буоллаҕа».

Сэрии оҕото Чурапчы улууһуттан төрүттээх Дмитрий Хоютанов кэргэнин кытта киэһэлэрин сэргэхтик атаара, дьону кытта көрсө-билсэ диэн тэрээһин буоларын истэн кэлбит. Дмитрий Фомич Кыайыы сылыгар 1945 сыллаахха төрөөбүтэ. Сэрии кэннэ ыар сылларга улааппыт буолан үлэ киһини киһи гынарын бэркэ билэбин диэн санаатын үллэстэр.

Дмитрий Хоютанов, сэрии оҕото: «Кыайыы кэннэ Ийэ дойдубут урусхалланан, аччык олоххо олорбуппут, кыра эрдэхпититтэн үлэлээн, дьоммутугар көмөлөһөн, колхуоска үлэлээн улаппыппыт».

Бу күн кэлбиттэри Гагарин уокуругун салалтата, куорат дьаһалтата эҕэрдэлээтэ. Кыайыы 80 сылынан сэрии оҕолорун, авиация 100 сылынан аивацияҕа үлэлээбит  бэтэрээннэри чиэстээтилэр, өйдөбүнньүк бэлэхтэри туттардылар. 

Агафья Габышева, Дьокуускай олохтооҕо: «Биһиги Гагаринскай уокурукка кэнсиэр көрө кэллибит. Наһаа үчүгэй чаҕылхай күн үүннэ».

Аҕам саастаахтар бу күн үҥкүүлээн, кэнсиэр көрөн, ыллаһан, куонкурска кыттан, оонньоон бириэмэлэрин бэрт сэргэхтик атаардылар. Кыра до болҕомто, чаҕылхай күн, киһиэхэ үтүө туругу бэлэхтиир буоллаҕа.