Саха сирин үрдүнэн от хампаанньата саҕаланна
Нам улууһугар быйыл 27 аҥар тыһыынча туонна оту оттуур былаан турар. Бүгүҥҥү күҥҥэ нам отчуттара ходуһаларыгар номнуо бастакы 110 гектар сирдэрин оҕустулар, 37 тонна оту кэбистилэр. Улууска өрүс уонна боротуокалар толору уулаах турар буолан, оттооһуну кытыл сиргэ сүрүннээн ыыта сылдьаллар. Хаһаайыстыбалар биирдиилээн окко киирэн саҕалаатылар. От үүннүүтэ сөрүүн турар буолан сиппэтэх, кылгас диэн сыаналыыллар.
Владимир Макаров, Нам улууһун тыа хаһаайыстыбатыгар салалтатын начальнига: «Биһи сирдэрбит намыһах сиргэ турар буоланнар оттооһун улаханнык бара илик. Былырыыҥҥыны кытта тэҥнээтэххэ халлаан тымныы буолан от үүнүүтэ соччото суох. Кыстыыр оппутун буолуохтаахпыт диэн былаанныыбыт».
Биллэн турар улуус, сир аайы үүнүү көрдөрүүтэ араастаһар. Сорох сиргэ кураан, сорохо уу таһыма түһэ илик, итиэннэ кэккэ улууска аһыҥка ыспыта эмиэ мэһэйдэри үөскэтиэн сөп. Улуустарга номнуо тыһыынчаттан тахса киһи оттуу сылдьар, сүүһүнэн тахса тиэхиникэ туттуллар. Билигин от үлэтигэр тиэхиникэ арааһа туттуллар буолан, оттооһун кэмэ тэтимирэн турар.
Ааспыт сайын өрөспүүбүлүкэ үрдүнэн 430 тыһыынчаттан тахса от оттонон, былаан 90-тан тахса бырыһыан туолбута. Маныаха элбэх оту ыраах сытар сирдэринэн, улуустарынан дьоҕус биригээдэлэр оттообуттара. Быйыл бу хайысхаҕа үбүлээһин көрүллүбэтэх. Маныаха үүнэр кыстыкка сүөһүгэ дороххой аһылыгар хаһаас пуондатын тэрийэр сыаллаах мобильнай биригээдэлэр ороскуоттарын толуйууга үп көрдүөхтэрэ.
Вячеслав Гаврильев, СӨ ТХМ үүнүүгэ уонна материальнай-техническэй хааччыллыыга департаменын салайааччы: Мобильнай биригээдэлэргэ үп-харчы быйылгы бүдьүөккэ көрүллүбэтэҕэ. Ол гынан баран син биир эбии финансирование көрдүөхпүтүн наада буолара буолуо. Киин улуустарга ардыы турар буоллаҕына, атын оройуоннарга баҕар ыарахаттары көрсүөхтэрэ, эбии оттуохпутун наада».
Мантан сайын хайдах күн-дьыл турарыттан оттооһун хаамыыта быһаччы тутулуктаах. Быйыл от хаачыстыбатыгар төһө кыалларынан улахан болҕомтону ууруохтара.
Дмитрий Тихонов, Мэҥэ Хаҥалас улууһун баһылыга: «17 тыһ. төбө ынах сүөһүнү, 16,5 тыһ. сылгыны кыстыкка киллэриэхтээхпит, уонна 44 тыһ. оту бэлэмниэхтээхпит».
Быйыл сайыммыт тымныытынан туругурда. Аны олох куурдубакка ардыы турар. Мантан сайын от үлэтэ үгэннээн турар кэмигэр кэккэ улуустарга сөҥүүлээх уонна муҥутаан 27 кыраадыс итийиэ диэн синоптиктар сылыктыылар.