Өймөкөөн улууһун нэһилиэктэригэр уу таһыма үрдээн дьиэлэр тэлгэһэлэригэр уу ыга киирдэ

Өймөкөөн улууһун Өймөкөөн, Куйдуһун, Сордоҥноох, Томтор нэһилиэктэригэр уу таһыма үрдээн дьиэлэр тэлгэһэлэригэр уу ыга киирдэ. Ый устата түспүт дохсун ардахтахтартан сылтаан хайа үрэхтэрэ, өрүстэрэ туолан нэһилиэнньэлээх пууннар тэлэгэһэлэрин уу ылла. Чуолаан Индигиир өрүскэ уу таһыма тахса турар. Маныаха улууска суһал ыстаап, нэһилиэктэргэ эвакопууннар тэриллэн балаһыанньаны хонтуруолга ылан олороллор.

Алексей Федотов, "Өймөкөөн улууһа" МТ баһылыгын бастакы солбуйааччы: «Сүрүн боппуруос Өймөкөөн бөһүөлэгэр турда. Манна критическэйин 6 см ааста. Билиҥҥи туругунан 12 олбуорга уу киирэн турар».

От ыйын 15 күнүн күнүс 3 чаастааҕы туругунан Сордоҥнооххо 33 олбуор, Куйдуһуҥҥа 14 тиэргэн ууга барда.  Маныаха наадалаах бородуукта, эмп 7-10ча сууккаҕа тиийэр сапааһа баар диэн олохтоох дьаһалтаҕа иһитиннэрэллэр.

Уус Ньараҕа Нерский диэн түөлбэ сорох олохтохторун көһөрдүлэр, 17 элбэх квартиралаах дьиэ тиэргэнигэр уу киирдэ.  Саамай сүрүн кыһалҕанан нэһилиэктэр икки ардыларын сибээстир айан суолугар быстыылар бааллар.  Ону тэҥэ Халыма суолун 1109-1117км алдьанан, учаастактарга сиэллээн, ол эбэтэр селевой поток түһэн айан харгыстанна, Ол курдук бэҕэһээ Халыма айан суолун 1030 километриттэн суол учаастагын сабан бары тырааныспарга айан-сырыы бобулунна. Манна күннэҕи кэтэбили олохтоотулар. 

Евгений Бугуев, "Бүлүү" суол салалтатын салайааччытын солбуйааччы: «Усть-Нераттан Аартыкка дылы суолбут сабыллан турар».

Муома улууһун Хонуутугар, Томпо улууһугар  эмиэ уу таһыма үрдээн турар. Маныаха 3 улууска үрдүк бэлэмнээх буолуу балаһыанньата биллэриллиннэн үлэ барар.

Дмитрий Лепчиков, СӨ гражданскай көмүскэл дьыалаларыгар уонна нэһилиэнньэ олоҕор-дьаһагар куттал суох буолуутун хааччыйыыга миниистир: «Органы управления Момского, Оймяконского и Томпонского районов переведены в режим повышенной готовности, ситуацию держим в постоянном контроле. Ведётся постоянная передача информации, спасательные службы готовы к реагированию».

Хас чаас ахсын балаһыанньа уларыйа турар. Бу күннэргэ Өймөкөөн улууһугар улахан сөҥүүтэ суох былыттаах күн-дьыл турар күүтүллэр.