Сайыммыт ортолоон оҕуруот аһын саамай силигилии ситэр кэмэ

Людмила Чепалова оҕуруота силигилии ситэр. Өлгөм үүнүү кистэлэҥэ - үүнээйигэ таптал. Хас сыарсыарда аайы астына дуоһуйа тэпилиссэлэрин көрөр. Помидорга олох уруккуттан Верлиока эрэ диэн суорту сөбүлээн үүннэрэр. 

Людмила Чепалова, Хатас олохтооҕо: «Сарсыарда тахсаммын бу курдук кыратык хамсатабын, оччоҕуна түргэнник ас биэрэр».

Людмила Михайловна инники сылларга олох улахан тэпилиссэни тутара. Инньэ гынан 90 сыыларга эбии дохуоттанара. Онон кини үүнээйигэ сыһыана ураты. Оҕурсутун номнуо ааспыт ый ортотуттан сии сылдьар. Сарсыарда аайы бу курдук 5-6 устууканы хомуйар. Людмила Михайловна хас да көрүҥ суорду үүннэрэр. Оҕурсуга сүрүнэ буора диэн этэр. 

Людмила Чепалова, Хатас олохтооҕо: «Буоругар болҕомто ууруохха наада. Сахсархай буолуон наада, кунус, кумах. Сыыһын ылан иһиэххэ наада, лабаалыахха наада. Уонна ити лабаатын куоттаран кэбиһэннэр аһын сааһырдан кэбиһэллэр. Лабааҕа икки оҕурсуну хаалларан баран төбөтүн быһан кэбиһэбин, оччоҕуна түргэнник ситэр».

Уопуттаах оҕуруоччут этэринэн  быйыл халлаантан сылтаан оҕуруот аһын үүнүүтэ бытаан. Ол оннугар сир аһыгар үчүгэй дьыл үүммүтүн бэлиэтиир. Людмила Михайловна  Хара кыталык моонньоҕону дьиэтин таһыгар үүннэрэр буолбута быданнаабыт. Эмиэ сыралаах үлэ түмүгэр сыллата өлгөм үүнүүн хомуйар.

Людмила Чепалова, Хатас олохтооҕо: «Киини ыламмын мээн быраҕаттыыбын, оччоҕо аныгыскы сайыҥҥа уу кутаргар бэйэтэ аһата сытар. Ол иһин буолунай астаах».

Маны сэргэ дьиэ тэлгэһэтигэр оҕуруот аһын арааһы үүнэр. Холобур, 40 устуука хаппыыста номнуо төгүрүйэн эрэр. Дьэдьэн, биэ эмиийэ курдук отоннор Людмила Михайловнага сыллата өлгөмнүк кытараллар. Кини бу дьарыгын сиэннэрин, хос сиэннэрин үлэҕэ сыһыараары, үүнээйигэ тапталы иҥэрээри олордор.

Людмила Чепалова, Хатас олохтооҕо: «Хаппыыста үчүгэй, 40 ук баар. Хос сиэним сииригэр анаан малиналаахпын».

Оттон тэлгэһэни дьэрэкээн сибэккилэр киэргэтэллэр. Маны барытын Людмила Чепалова кыһын эрдэттэн рассаадалаан илиитин сылааһынан бүөбэйдээн олордор.