Үөрэх кыһалара кэлэр дьылга устудьуоннары ыларга докумуону хомуйаллар

Арктикатааҕы судаарыстыбаннай агротехнологическай университетка үөрэххэ туттарсыы үгэнэ. Докумуону тутуу аҕыйах күн хаалан абитурент толору. Төһө да сайаапка улахан өттө Госуслуги портал нөҥүө кэллэр, эт атаҕынан кэлээччи син биир элбэх. АГАТУга быйылгы үөрэх дьылыгар 756 бүддьүөт миэстэтэ көрүллүбүт. Быйыл тус сыаллаах миэстэ биллэ эбиллибит.

Олеся Винокурова, АГАТУ киин тутар хамыыһыйатын салайааччы: «Арассыыйа Бырабыытылыстыбата целевой миэстэ көрөн турар. 138 миэстэҕэ тэрилтэлэр өттүлэриттэн этии оҥоһуллан турар “Работа в России” диэн порталга. Онон биһиги абитуреннарбытын күүтэбит».

Өрөспүүбүлүкэ биир сүрүн үөрэҕин кыһата уопсайа барыта 25 хайысханан исписэлиистэри бэлэмниир. Ону таһынан  хас биирдии исписээлинэскэ эбии үөрэхтээһин көрүллэр. Оттон быйыл ордук тыа хаһаайыстабатын салаатыгар урбааны сайыннарыыга болҕомтону уурдулар.

Андрей Сидоров, АГАТУ Агробизнес факультетын декана: «Биир дипломунан икки хайысха компетенцияларын ылаллар. Холобур, бэйэлэрэ тэрилтэ тэриниэхтэрин сөп».

Номнуо бу идэҕэ олус элбэх сайаапка киирбит. Оттон хаһыс да сылын ойуур хаһаайыстыбатын үлэһитэ, агроинженер курдук исписээлинэстэргэ буоларын курдук куонкурус үрдүк. Итиэннэ технолог идэтэ эмиэ биир саамай наадыйыллар. Кэбээйи улууһуттан сылдьар Александр Ксенофонтов технологка докумуонун туттарда.

Александр Ксенофонтов, үөрэххэ туттарсааччы: «Дойдубар баран балыктыам, балыгы переработкалыам уонна атыылыам, харчы оҥостуом».

Маны тэҥэ ойуур комплексын уонна сири таҥастааһын факультетыгар сыллата миэстэ эбиллэр. Манна ордук ландшафтный дизайн, лесник курдук идэлэргэ оҕолор туттарсаллар.

Мария Слепцова, АГАТУ ойуур комплексын уонна сири таҥастааһын факультетын декана: «Биһиги факультеппытыгар 186 миэстэ көрүлүннэ».

Маны таһынан АГАТУ иһинэн икки колледж баар, онно докумуону тутуу эмиэ биир тэҥҥэ барар. Манна 9 уонна 11 кылаас кэннэ ылаллар.