Билигин сир аһа ситэн эрэр кэмэ

Сайыммыт барахсан мааны минньигэс бэлэҕиттэн бастакынан амсайыан баҕалаахтар тыаҕа тахсаллар. Улуус-улуус аайы сир аһын араас көрүҥэ кэмигэр ситэр. Сир асчыттар кэтэһэн-манаһан мантан-инньэ  дьэ ох курдук оҥостон ойуурга үлэ курдук сыбыытыахтара турдаҕа. 

Тэллэйдээх сайын бар дьону соһутта. Үгэс быһыытынан тэллэйи Саха сиригэр атырдьах ыйыттан хомуйар эбит буоллахтарына, быйыл бэс ыйыттан тэллэйдээтилэр. Социальнай ситиминэн дьон тэллэйдии сылдьарын, тэллэй амсайбытын туһунан көхтөөхтүк видео таһаарар. Оонньуур курдук сип-сибиэһэй тэллэй киһи ыларын көһүппүт курдук үүнэн турара көрүөххэ эриэккэс.

Өрөспүүбүлүкэ үрдүнэн сыл ахсын сир аһын хомуйуутугар нэһилиэнньэҕэ анаан болдьох олохтонор. Ол курдук от ыйын 5 күнүттэн түбүктэ ол эбэтэр жимолость хомуллар.  Маныаха улуус аайы болдьох күннэрэ араастаһар.

Варвара Фёдорова, ойуур хаһаайыстыбатын департаменын салайааччытын солбуйааччы: «Бу күннэртэн саҕалаан киин улуустарга уонна илин эҥэр улуустарга дьэдьэни уонна кыһыл хаптаҕаһы хомуйан саҕалыахха сөп. Бүлүү бөлөх улуустарга ый ортотуттан сааҕалаан хомуйуохха сөп. Сугуну от ыйын 20 күнүттэн саҕалаан хомуйуохха сөп. Хоту улуустарга ый бүтүүтэ ситиэҕэ».

Аһаҕас сирдэргэ, дэлээнэлэргэ дьэдьэни номнуо үргээн эрэллэр диэн кэпсииллэр. Ол эрээри биир үксүн сөрүүн сайын турар буолан дьэдьэн ситэ илик, саҥа сибэккилээн аһа олох кыра, күөх турар. Дьэдьэни дьүөрэлии хаптаҕас номнуо кытаран эрэр. Үүнүү өлгөм буолсу диэн олохтоох сир асчыттар сылыктыыллар.

Кылгас сайыммыт өҥ быйаҥа, минньигэс бэлэҕэ - баай битэмииннэринэн киһи доруобуйатыгар бэрт туһалаахтара дакаастанан турар. Онон сотору дьон сир астыырга бэлэм.

Бу ыйга уһуннук ардаабакка, куйаас күннэр сатыылаахтарына, сир аһа дьэдьэн, хаптаҕас, сугун, отон өлгөмнүк үүнэн хас биирдии сир асчыт, ыал кыһыҥҥы уһун күннэрин минньигэс барыанньалаах керсүөҕэ.