Олоҥхо Ыһыаҕа Нерюнгри оройуонугар түмүктэннэ
Саха сиригэр 18-с төгүлүн ыытыллар Олоҥхо Ыһыаҕа түмүктэннэ. Быйыл Олоҥхо Ыһыаҕа Нерюнгри куоракка Таастаах ытык сиригэр буолла. Үс күн устата 70-тан тахса тэрээһин, хас да түһүлгэнэн ыытылынна.
Олоҥхо Ыһыаҕын үһүс күнүгэр, түмүктэри таһааран кыайыылаахтары ааттаатылар. Бүлүү улууһуттан төрүттээх, Мэҥэ Хаҥаластан сылдьар Станислав Иванов эдэрдэргэ олоҥхону толорууга Гран-при хаһаайына буолла.
Станислав Иванов, "Олоҥхо оспот омоон суолларынан" күрэс кыайыылааҕа: "Олоҥхо Ыһыаҕа ыытыллыаҕыттан кыттабын. Быйылгы дьылга маҥнайгы кыайыым. Аҕабар анаан бэйэм айбыт олоҥхобунан кыайбыппынан олуһун диэн үөрэбин".
Быйыл олоҥхону толорууга күрэх саамай элбэх кыттааччылаах буолла. Манна барыта 200-тэн тахса олоҥхоһут үс бөлөххө арахсан кытынна. Кэнники кэмнэ олоҥхолуур оҕолор элбээтилэр диэн тэрийээччилэр үөрэ бэлиэтииллэр.
Александра Васильева, дьүүллүүр сүбэ: "Быйыл бөлөхтөр биэстэн аҕыйаҕа суох ахсаннаах кытыннылар, үксүн 9-10 киһилээх буоллулар. Уратыта диэн Нерюнгри куорат олохтоохторо “Ситим” диэн бөлөх туруоран олоҥхону иһитиннэрдилэр".
Олоҥхо ыһыаҕар оһуохайга, олоҥхоҕо, хомуска, иис-уус эйгэтигэр уонна да атын күрэстэргэ саха төрүт култуурата, ийэ тылбыт, үгэстэрбит үүнэр көлүөнэлэргэ бэриллэ туралларыгар туһуланан ыытыллар.
Олоҥхо ыһыаҕар Ил Дархан Айсен Николаев бастакынан уустар түһүлгэлэригэр тимир уһаарыытыгар кытынна. Манна Таатта улууһун Алдан өрүһүн кытылыттан тимири аҕалбыттар. Тимир кытаанах уонна ньыгыл буолан биэрдэ.
Айсен Николеав, СӨ Ил Дархана: "Мин санаабар, биһиги үйэлэри уҥуордаан илдьэ кэлбит үгэспитин кэнники сылларга күүскэ сайыннардыбыт, сайыннардыбыт. Биһиги уустарбыт аан дойдунан аатыран эрэллэр. Кинилэр үлэлээннэр саха быһаҕа, саха хомуһа эмиэ аан дойду эйгэтигэр таҕыста. Ол иһин кэлэр да сылларга биһиги бу курдук үгэспит сайдан иһиэ диэн санаалаахпын".
Олоҥхо ыһыаҕын биир ураты уонна элбэх кыттааччыллах былаһааккатынан аҕыйах ахсааннах норуоттар түһүлгэлэрэ буолла. Ил Дархан Айсен Николаев манчорай эбэҥки үнкүүтэ өрөспүүбүлүкэтээҕи этническэй култуура реестарыгар киирбитин туһунан туоһу сурук туттарда.
"18 төгүлүн ыытыллар Олоҥхо Ыһыаҕа быйыл Нерюнгри куоракка ыытылынна. Манна өрөспүүбүлүкэттэн, атын регионнартан, атын дойдуттан ыалдьыттар кэллилэр. Оттон ыһыах сүрүн киэргэлинэн Аал Луук мас буолар. Көрөрбүт курдук манна элбэх ыалдьыт кэлэн хаартыскаҕа түһэр, баҕа санаатын этэр".
Хас биирди ыытыллар Олоҥхо Ыһыаҕар Аал Луук мас ураты, дириҥ ис хоһоонноох буолар. Маны таһынан ыһыах ыытыллыбыт сирэ Таастаах эмиэ ураты эйгэлээх буолла.
Тэрийээччилэр, Нерюнгри олохтоохторо, ыалдьыттар бары сахалыы таҥастаах кэлбиттэр. Төһө да күн-дьыл уларыйдар дьон-сэргэ Олоҥхо Ыһыаҕын астыммыттарын биллэридилэр.
Аны эһиил 2026 сылга Олонхо Ыһыаҕа Кэбээйи улууһугар ыытыллыаҕа.