"Умнас" суолга икки сиринэн өрөмүөн үлэтэ барар

7 сантымыатыр үрдүктээх аспаал алларааҥҥы өттө кутуллан,  аналлаах тиэхиньикэ салгыы анньыллыбыт дьапталҕаны тэҥниир. Барыта  сөрү -сөп, көбүс көнө буолуохтаах. Оттон бу Хаҥалас улууһун устун ааһар  региональнай таһымнаах  "Умнас" суолу оҥоруу үлэлэрэ  ыытылла тураллар. Тустаах суол "Олох инфраструктурата" национальнай бырайыак чэрчитинэн үбүлэнэн оҥоһуллар.

Геодезист идэлээх Прокопий Попов көмөлөһөөччүлэрин кытары үлэ эмиэ биир саамай суолталаах өттүн оҥорор. Кинилэр сытыы харахтарын, чопчу суоттааһыннарын түмүгүнэн суолбут көнө, аспаалбыт тэҥ буолуохтаах.

Прокопий Попов, геодезист: «Аспаал кутуутун оҥоро сылдьабыт. Суол кытыытынан быа тардабыт итиэннэ анал туттаһыктары иилэбит. Манан аспаал көнөтүн уонна үрдүгүн кээмэйдээн кутабыт».

"Тымныы регенерация" диэн ааттаах ньыманан  суол оҥоһулла турарын   учаастак маастара Александр Малыш кэпсиир. Икки хос, 5 уонна 7 сантымыатыр үрдүктээх дьапталаҕаланан аспаал кутуллар. Маны кытары тэҥҥэ суол оборуудубанньатын туруорар үлэлэр барар.

Александр Малыш, суол учаастагын маастара: «Суол кытыы өттүн оҥоробут, турбалары уларыттыбыт. Былаантан хаалыыта суох үлэ барар, хантараак быһыытынан балаҕан ыйын 30 күнүгэр диэри үлэни түмүктүөхтээпит».

Маны тэҥэ "Умнас" суол 20-с киэлиэтириттэн 28 килэмиэтиригэр диэри эмиэ киэҥ далааһыннаах үлэлэр ыытыллалар. Тустаах учаастак Саха сирин биир сүрүн аартыгын ситимигэр киирэн, Өлүөнэ эбэ муостатын суолун кытары ситимниэҕэ.

Айгылаан Григорьев, суол учаастагын маастара: «Билигин суолу кэҥэтэн буор кута сылдьабыт. Ол аата икки балаһалаах суол түөрт балаһалаах буолар. Оптуобус тохтобуллара, суол кытыытынан күрүө, тротуар баар буолуохтара».

"Умнас" суолу оҥоруу биир улахан суолталаах үлэ буолар. Национальнай бырайыак чэрчитинэн оҥоһуллар үлэ олохтоохтор олорор усулуобуйаларын тупсарар сыаллаах ыытыллар.