Күн-дьыл туруга оҕуруот аһын, сибэкки үүнүүтүн атахтыыр

Оҕуруоттаах хаһаайка хаптаҕаһын сэбирдэҕин олоччу  үөн сиэбититтэн уолуйбут каадырдара куйаар ситимигэр тарҕанар. Ханна уһуллубута биллибэт. Оттон бу хаартыска Покровскай куоракка түһэриллибит. Манна талахха бүүс бүтүннүү эмиэ түүлээх үөн ыспыта көстөр.

«Ити хаартыскаҕа көстүбүт үөн тас көрүҥүнэн шелкопрядка маарынныыр, ол эрэн биологтар быһаарбыттарынан ванесса диэн лыах гусеницата. Сүрүннээн сэбирдэхтээх үүнээйилэри сиир, Саха сиригэр харантыыннаах буортулааччыларга киирбэт», - Мария Дмитриева, корреспондент.

Быйыл сайын араас үөн-көйүүр олус элбэҕин үгүс киһи бэлиэтиир. Сүрүннээн оҕуруотчуттар кыһалҕаны көрсөллөр. Буортулааччыттан сибэккилэр эмиэ үүнүүлэрэ тохтуур. Арктикатааҕы агротехнологическай университет киин куораты көҕөрдүүгэ сыллата үлэлэһэр. Аргономия факултетын устудьуоннара уһуйааччыларын кытта тэҥҥэ ыарытыйбыт сибэккилэри билигин эбии аһатар, буортулааччыттан эмтиир үлэни ыыталлар. Бу кинилэргэ эмиэ улахан уопуту биэрэр.  

Василий Чичигинаров, АГАТУ агрономия факультетын доцена: «Тымныйан үүнэллэригэр тохтооһун баар, ону таһынан үөннэр бааллар. Холобур, тля даҕаны, паутинный клещ, кымырдаҕастар элбэхтэр. Үүнэйилэр сүмэһиннэрин иһэллэр, онон мөлтөтөллөр».  

Оттон Хатас олохтооҕо Людмила Чепалова оҕуруота силигилии ситэр. Оҕурсутун номнуо ааспыт ый ортотуттан сии сылдьар. Сарсыарда аайы бу курдук 5-6 устууканы хомуйар. Кини этэринэн быйыл халлаантан сылтаан оҕуруот аһын үүнүүтэ бытаан. Ол оннугар сир аһыгар үчүгэй дьыл үүммүтүн бэлиэтиир.

Людмила Чепалова, Хатас олохтооҕо: «Күһүн сэбирдэҕин ыраастыыбын үөһр көйүүр сыстыбатын диэн уонна кии барыҕаттыыбын. Саас уонна сайын аһата сытарын курдук. Көрүҥҥүтүүй, бу хайдах курдук үүммүтүн. Астынабын аҕай».

Буортулааччыны утары оҕуруоччуттар араас норуот ньыматын, маҕаһыыннарга атыыланар анал эмтэри туһаналлар. Оттон харантыыннаах үөннэри Россельхознадзор исписэлиистэрэ ылсаллар. Аһыҥаны Тыа хаһаайыстыбатын министиэристибэтэ былаан быһыытынан сыллата эмтиир.