Хатас агро оскуолатын лааҕырыгар үлэ күөстүү оргуйар

"Баҕарах" хаһаайыстыбаҕа ньирэйдэр сарсыардааҥҥы аһыыр кэмнэрэ. Сайыҥҥы өттүгэр Хатас оскуолатын оҕолоро көмө буолаллар. Онон үлэ тэтимнээхтик барар. Ньирэйдэр үтүрүспэтиннэр диэн  кыргыттар биирдиилээн киллэрэн аһаталлар.

Виолетта Баишева, Хатас агро хайысхалаах оскуолатын үлэ лааҕырын иитиллээччитэ: «10 чаастан 12 чааска диэри үлэлиибит. Хотону хомуйабыт, ньирэйдэри аһатабыт». 

Үөрэнээччилэр Хатас оскуолатын үлэ лааҕырын нөҥүө хаһаайыстыбаҕа үлэлииллэр. Хаһыс да сылын симиэнэ ахсын 10 оҕо ньирэй көрүүтүгэр сылдьыһар.  Кыргыттар аһатар кэмнэригэр уолаттар далы ыраастыыллар, сорохтор ардах уутун ыытаары хоруу хороллор. Бары үлэлии үөрүйэхтэр, хаһыс да сайыннарын сылдьар буолан.

Радик Фёдоров, Хатас агро хайысхалаах оскуолатын үлэ лааҕырын иитиллээччитэ: «Сайын лааҕырга харчы өлөрөөрү үлэлии киирэбин. Быйыл сайын иккис сылбын сылдьабын. Үлэбин сөбүлүүбүн. Манна табаарыстарбын кытта сылдьабыт». 

Үлэ далга барар, оттон сотору кэминэн боротуока уута түстэҕинэ ньирэйдэри күөххэ мэччитиэхтэрэ. Лааҕыр иитиллээччилэрин үгүс өттө оҕуруот хайысхатын талан сылдьаллар. Саҥа учаастакка теплица көрөллөр, оскуола таһыгар сибэкки арааһын үүннэрэллэр. Бу симиэнэ сүрүн үлэтэ аны аҕыйах хонугунан саҕаланыа, кучу от ситтэ эрэ хатас оскуолатын аатырбыт чээйин хомууругар тахсыахтара.

Зарина Пестерева, Хатас агро хайысхалаах оскуолатын үлэ лааҕырын иитиллээччитэ: «Былырыын фермаҕа үлэлиир этим, оттон быйыл оҕурокка кэллим. Естественнай хайысхалаах кылааска үөрэнэбин, онон миэхэ уопут биэрэр». 

Оҕуруокка сылдьааччылар күҥҥэ 4 чаас үлэлииллэр, оттон ньирэй көрөччүлэр иккилии чаас. Маныаха иккитэ аһыыллар, сарсыардааҥҥы уонна толору эбиэт лааҕыр бэрээдэгэр киирэ сылдьар.  Агро хайысхалаах оскуола Дьокуускайдааҕы тыа хаһаайыстыбатын салалтатын граанын сүүйбүтүн, оҕолор хамнастарыгар ыытар. Онон лааҕырга сылдьыан баҕалаах үгүс.

Николай Матвеев, Хатас агро хайысхалаах оскуолатын дириэктэри инновация уонна агротехнология хайысхатыгар солбуйааччы: «Биһиги лааҕырбыт хамнастаах. Маныаха Дьокуускай куорат дьарыктаах буолуу киинигэр улаханнык махтанабын. Оҕолорго хамнастарын таһынан материальнай көмө көрөллөрүгэр». 

Уолаттар саҥа сир бөҕүн,сыыһын ыраастыыллар. Инникитин манна өрөспүүбүлүкэ оҕотун төгүрүк сыл түмэр киин тутар былааннаахтар. Оттон лааҕыр түмүгүнэн иитээччилэр ким туохха баҕалааҕын, доҕурдааҕын бэлиэтии көрөн үөрэх дьыла саҕаланнаҕына чинчийэр үлэлэри саҕалыахтара.