Дьокуускай аннынан Өлүөнэ кытылын ыраастаатылар
Үгэс буолбут тэрээһин Өлүөнэ өрүс күнэ төрүттэниэҕиттэн 2013 сылтан ыытыллар.Сыллата кыттааччы тэрилтэ ахсаана эбиллэр. Аҥаардас Айылҕа харыстабылын министиэристибэтин үлэһиттэрэ эрэ буолбакка куорат, өрөспүүбүлүкэ тэрилтэлэрэ эбиллэллэр. Алексей Антонов ГУП ЖКХ тэрилтэ кылаабынай исписэлииһэ, аан бастакытын бу аахсыйаҕа кыттыһар.
Алексей Антонов, СӨ олох-дьаһах коммунальнай хаһаайыстыбатын тэрилтэтин кылаабынай исписэлииһэ: "Өлүөнэ өрүс күнүнэн бэйэм кыра көмөбүн тиэрдээри кытта кэллим. Биһиги элбэх буолан тэрилтэбитинэн субуотунньукка таҕыстыбыт".
Бу сырыыга сүүсчэкэ кыттааччы 202 түөлбэҕэ лодочнай станция территориятын эргин ыраастаата. Хас биирдии киһи куул тутуурдаах биэрэк кытылын бөҕүн-сыыһын хомуйда. Тэрээһин сүрүн сыала-соруга дьон болҕомтотун тардыы, өрүспүт ыраас буоларын туһугар бэйэ кылаатын киллэрии буолар.
Михаил Ан, СӨ быыһыыр сулууспа Бүлүүтээҕи быыһыыр-көрдүүр этэрээтин салайааччы: "Сүрдээх үчүгэй аахсыйаҕа кэлэн кыттыыны ыла сылдьабын. Өлүөнэ өрүспүтүн бары биир киһи курдук харыстаан, киэн уттан сылдьыахтаахпыт. Бары эбэбититтэн аһаан олоробут".
Өлүөнэ эбэбит Байкал күөлтэн саҕаланар уонна Лаптев муоратыгар кэлэн түһэр. Уһуна 4400 километр, аан дойдуга уһунунан 10-с миэстэни ылар. Билиҥҥи кэмҥэ өрүс киртийиитин кыһалҕата сытыытык турар. Маныаха нэһилиэнньэ эрэ буолбакка, тэрилтэлэр, салалта таһымыгар былааннаах үлэ ирдэнэр.
Николай Додохов, СӨ экология миниистирин солбуйааччы: "Биһиэхэ хас да өрүс күнэ баар. Кэлэр ыччакка өрүстэрбитин ыраас хаалларыахпытын наада. Ол сыл аайы маннык аахсыйа тэрийэн, өрүс кытылларын ыраастыыбыт".
Маннык субуотунньуктары тэҥэ федеральнай таһымҥа Өлүөнэ өрүс уутун туругун тупсарыыга, биэрэги бөҕөргөтүүгэ сыллата үгүс үлэ ыытыллар.Бу сылтан дойду бырайыагар хабыллан олохтоох өрүстэри, үрэхтэри ыраастыырга үлэ барара күүтүллэр.
Пётр Аргунов, Өлүөнэтээҕи уу салалтатын салайааччы: "Быйылгыттан “Вода России” диэн федеральнай бырайыакка киирдибит. Эһиилгиттэн, барыта этэҥҥэ буоллаҕына, Дьокуускай иһигэр баар куораттары уонна Мархинка, Шестаковка үрэхтэри ыраастыахтаахпыт".
Былырыын Үөһээ Бүлүү аннынан быһыт тутуу үлэтэ түмүктэммитэ, быйыл Дьааҥы куоратыгар ыытыллара былааннанар. Субуотунньукка хас биирдии кыттааччыны көҕүлүүр сыаллаах саамай түргэн, саамай эдэр, саамай уопуттаах хомуйааччылары бэлиэтээтилэр. Маннык тэрээһин улуустарынан эмиэ салҕаныаҕа.