Быйыл от кэмигэр кураан буолара сылыктанар

Сотору ходуһа устун хотуур тыаһа хардыылыа, тыраахтыр тигиниэ. Саха сирин үрдүнэн  быйылгы от былаана 435 тыһыынчаттан тахса туонна, маны тэҥэ 24 тыһыынча тонна сиилэс, 13 тыһыынчаттан тахса туонна сенаж бэлэмниир сорук турар.Бүгүҥҥү күҥҥэ тыа хаһаайыстыбатын министиэристибэтэ улуустартан оттооһуҥҥа билгэлээһин көрдөрүүтүн хомуйар. Ол курдук нэһилиэктэр оттуур сирдэрин, ходулаһаларын көрөллөр, от үүнүүтүн бэрэбиэркэлииллэр.

Вячеслав Гаврильев, СӨ ТХМ үүнээйигэ, сир салаатыгар департаменын салайааччы:"От ыйын 7 күнүгэр диэри улуустартан от үүнүүтүн сылыктааһынын күүтэбит. Нэдиэлэ аайы улуустары кытта планерка ыытыллар. Онно окко бэлэм, тиэхиньикэ туруга, уматык боппуруостара көрүллэр, сүбэлэһэ, кэпсэтиһэ олоробут".

Ааспыт сайын республика үрдүнэн 430 тыһыынчаттан тахса от оттонон, былаан 90-тан тахса бырыһыан туолбута. Маныаха элбэх оту ыраах сытар сирдэринэн, улуустарынан дьоҕус биригээдэлэр оттообуттара. Быйыл бу хайысхаҕа үбүлээһин көрүллүбэтэх. Маныаха үүнэр кыстыкка сүөһүгэ дороххой аһылыгар хаһаас фондатын тэрийэр сыаллаах мобильнай биригээдэлэр ороскуоттарын толуйууга үп көрдүөхтэрэ. Мэҥэ Хаҥалас улууһугар окко бэлэмнэнии көхтөөхтүк барар.

Дмитрий Тихонов, Мэҥэ Хаҥалас улууһун баһылыга:"17 тыһыынча төбө сүөһүнү 16,5 тыһыынча сылгыны биһиги кыстыкка киллэриэхтээхпит. Уопсайа быйыл 44 тыһыынча туонна оту бэлэмниэхтээхпит. Айылҕабыт көмөлөстө, ардах бэрт үчүгэйдик түстэ. Онон от үүнүүтэ куһаҕана суох, дьон-сэргэ окко киирээри бэлэмнэнэ сылдьаллар". 

Үлэни эрдэттэн сөпкө тэрийдэххэ эрэ, туруоруллубут былааны ситиһиэххэ сеп. Онон отчуттар күн бүгүн балаһыанньа хайдах-туох буоларын суоттуу-учуоттуу сылдьаллар. Ол эрэн ордук тыа хаһаайыстыбатын салаата хайдах күн-дьыл турарыттан быһаччы тутулуктанар. Бэс ыйыгар уһуннук, элбэхтик ардаан от үүнүүтэ үтүө буоларыгар эрэл баар.

Артём Александров, СӨ тыа хаһаайыстыбатын миниистирэ: "От ыйа тэбэн от кэмигэр үчүгэй күннэр туруохтара диэн сылыктыыбыт 435 тыһыынча туонна дороххой оту бэлэмнээн этэҥҥэ кыстыкка киирэр баҕа санаалаахпыт. Халлаан хайдах буолара биллибэт, кимтэн да ыйыппат". 

Саха сиригэр маассабай окко киирии от ыйын ортото саҕаланыаҕа.

«Онуоха диэри бары бэлэмнэнии үлэлэрэ түмүктэниэхтээхтэр: мелиоративнай үлэлэр, аһыҥаны утары охсуһуу, тыа хаһаайыстыбатын тиэхиньикэтин көрүү-истии, ходуһаларга тиийэр суолу-ииһи көннөрүү,муосталары өрөмүөннээһин үлэлэри үмүрүтүөхтэрэ", - Татьяна Николаева, корреспондент.