Дьокуускай куоракка кэнсиэрбэ бородууксуйатын оҥорон таһаарар саҥа сыах тутуллар

Иркусткай уобаластан уонна Саха сирин ас-үөл технологиятын киинин исписэлиистэрэ бу күн Арктикатааҕы эргиэн уонна логистика хампаанньатыгар ыалдьыттыыллар. Оттон бу көрсүһүү ураты буолар. Күн бүгүн манна өрөспүүбүлүкэ эмиэ биир улахан суолталаах эбийиэгэ үлэҕэ киирэригэр туһуламмыт кэпсэтиилэр ааһаллар. Сотору кэминэн бу сыахха куҥҥэ 2500 тахса эттэн, оҕуруот аһыттан уонна сир аһыттан кэнсиэрбэлэр оҥоһуллан тахсыахтара.

Людмила Емельянова, Арктикатааҕы эргиэн - логистика хампаанньатын кылаабынай технолога: «Технологиябыт ГОСТунан буолуохтаах. Техусулуобуйа оҥоруохтаахпыт. Кэнсиэрбэбит тимир баанкалаах буолар, автоклавтанар, харайыы болдьоҕо уһун буолуохтаах. Оҕуруот аһыттан кэнсиэрбэбит таас баанкалаах буолар. Дой-пакка эмиэ оҥоһуллар, тиэйиитэ чэпчэки буолар. Сироп, барыанньа ПЭТ иһиттээх буолар, онтукабытын бэйэбит үрэн оҥорон таһаарабыт».

Бу курдук сотору кэминэн үлэ күөстүү оргуйуохтаах. Билигин оборуудабанньа кэлэн, сотору маны таҥыы үлэтэ ыытыллан саҕаланыахтаах. Онтон билигин номнуо кэнсиэрбэлэр сырьеларын хантан ыларга үлэ барар. Холбура, сир аһын Арктика олохтоохторуттан хомууйу саҕаланыа.

Алексей Шестаков, Арктикатааҕы эргиэн - логистика хампаанньатын таҥыыга уонна атыыга салаатын салайааччыта: «2024 сылтан дикорос тутан саҕалаабыппыт. Быйыл ол үлэбитин салҕыыбыт. Ол курдук, хоту улуустарга моруоска, сугун уонна отон тутабыт. Быйылгы сыанабыт моруоска 1600 солк, сугун 600 солк, отон 300 солк буолаллар. Дуогабар түһэрсэбит чааһынай дьоннору кыытта».

Сир аһын туттарааччылар маныаха бородууктанан да төлөбүрдэрин ылыахтарын сөп. Маны кытары тэҥҥэ тэрилтэ инитриэһинэй аахсыйаны тэрийиэҕэ. Ол курдук, сир аһын туттарааччылар истэригэр сүүйүү ыытыллан, кыайыылаах электрическай байкы ылары ситиһиэҕэ.Итиэннэ атын сыаналаах бириистэри. Бу курдук, нэһилиэнньэҕэ дохуот киллэрэргэ эмиэ биир табыгастаах ньыма баар буолуоҕа.

Иннокентий Петров, Арктикатааҕы эргиэн - логистика хампаанньатын салайааччытын бастакы солбуйааччыта: «Биһиэхэ оборудобанньа кэлэн турар. Ону холбуур үлэ саҕаланыахтаах. Биһи хоту таһаҕас тиэйии кыттыылаахтара буоламмыт биһи арктикатааҕы улууспутун хааччыйабыт. Онно көмө буоларга сыах тутулла турар».

Саҥа сыах тыа хаһаайыстыбатын министиэристибэтин 70% көмө харчытынан үлэҕэ киириэҕэ. Оҥоһуллан тахсыбыт бородуксуйалар Арктика уонна Хоту улуустар торговай-логистическай кииннэригэр тиийиэхтэрэ.