Туймаада ыһыаҕа үрдүк таһымнаахтык ааста
Үрдүк айыылартан көҥүл ылан, Үрүҥ тунах ыһыах арыллыытын сиэрэ -туома саҕаланар. Үс Хатыҥ ытык туонатыгар 3 алгысчыт биир сомоҕо буолан — сылы этэҥҥэ туоруур көрдөһүү алгыһын толороллор.
Быйыл Дойду үрдүнэн үУлуу Кыайыы 80 сыла. Туймаада ыһыаҕа эйэлээх халлааны уһансыбыт дьоммутугар сүгүрүйэр, кинилэр ааттарын үйэтитэр сыаллаах быйыл тэрилиннэ.Үгэс быһыытынан алгыстаах үрүҥ илгэни охторуу сиэрин Ил Дархан Айсен Николаев толорон, сахатын дьонун уруйдаан, анал байыаннай дьайыыга сылдьар уолаттарыбытыгар баҕа санаатын тириэртэ.
Айсен Николаев, СӨ Ил Дархана: "Анал байыаннай дьайыыга сылдьар уолаттарбытыгар бүгүн этиллибит алгыс тиийдин".
Быйылгы Туймаада ыһыаҕа Улуу Кыайыыбытыгар ананан "Кыайыы оһуокайа" диэн ааттаах өрөспүүбүлүкэ курэҕэ үгүс элбэх этээччини түмтэ.
"Улуу Кыайыы 80 сылыгар анаммыт оһуохай үгүс киһини түмтэ. Ол курдук Үс Хатыҥҥа кэлбит ыалдьыттар илии-илиилэриттэн тутуһан үҥкүүлүүллэр", - Анастасия Добрянцева, корреспондент.
Бу күн Саха сирин оһуокай түмсүүтэ саҥа уораҕайданан үөрүүтэ муҥура суох. Чулуу оһуохайдьыт, бэргэн этээччи Сергей Зверев -Кыыл уолун 125 сылыгар бэртээхэй бэлэх Ус Хатыҥы киэргэттэ.
Марта Николаева, СӨ оһуохай түмсүүтүн бэрэссэдээтэлин солбуйааччы, Дархан этээччи: "Биһиги салайааччыт Александр Джурович хас да сыллаах туруорсуутунан Дьокуускай куорат салалтата наһаа үчүчгэй балаҕан тутан биэрдэ".
"Кудай Бахсы" түһүлгэ тимир уһаарааччыларын түмтэ. Дойдуга аатырбыт саха быһахтарын охсооччулар, маастардар, эдэр да талааннар манна үлэлэрин дьон дьүүлүгэр таһаардылар. Итиэннэ бастыҥ иһин кииристилэр. Маастар кылаас көрдөрдүлэр.
Николай Михайлов, тимир ууһа: "Биһиги курдук тимиринэн уһанааччы аҕыйах соҕус. Ол иһин сырдатан, дьоҥҥо көрдөрө сатыыбыт".
Биллэн туран, Үрүҥ тунах ыһыахха дьон-сэргэ сыл устата мунньуллубут санаатын-оноотун, баттыгын манна кэлэн ыраастанар, сайаҕанар. Быйыл үгэскэ кубулуйбут сиэр-туом ааһар түһүлгэтигэр ыраахтан -чугастан кэлбит ыалдьыттар алгыстанныллар, кэлэр сылга күүс-күдэх ыллылар.
Онтон быйылгы Саха дьонун түмэр-сомоҕолуур бырааһынньыкка сүүһүнэн тыһыынча киһи ыалдьыттата, ыһыах арыллыытыгар 1200 киьи кыттыны ылла.