Саха сиригэр Астана күннэрэ ыытыллыннылар
Саха сирэ Казахстаны кытта сибээһин бары салааларга олохтоон үлэлэспитэ ыраатта. Астана күннэрин чэрчитинэн элбэх көрсүһүүлэр, кэпсэтиилэр ыытыллыннылар.
Ил Дархан Айсен Николаев Астана куорат акиматын Женис Касымбековы кытта көрсөн инникитин даҕаны бииргэ үлэлэһэргэ меморандумҥа илии баттастылар.
Айсен Николаев, СӨ Ил Дархана: “Бу собүлэҥи олоххо киллэрии Саха сирэ уонна Астананы бииргэ үлэлэһиилэрин өссө бөҕөргөтүө, үрдэтиэ, Казахстаны кытта сыһыаны саҥа таһымҥа таһаарыа. Биһиги сайдан иһэбит, бииргэ үлэлэһиибит хайыхалар кэҥиир”.
Казахстан делегацията Туймаада ыһыаҕын чэрчитинэн кэлэн ыалдьыттаата. Аҕыйах кэм иһигэр бары хайысхаҕа тэрээһиннэр ыытыллыннылар.
Анатолий Босиков, СӨ инновация сайдыытын пуондатын тэрилтэни кытта үлэлэһэр салаатын салайааччыта: “Кинилэри кытта үлэлэһэр бастакы уопут баара. Ол уопуту билигин хайдах гынан атын хайысхаларга тарҕатыахха сөбүй диэн. Биһиэхэ Саха сиригэр оонньууну оҥоруу эрэ сайдыылаах буолбатах. Ону тэҥэ айти хайысхалар, креативнай индустрия, киинэни устуу, ойуулук оҥоруу, таҥас тигиитэ курдук хайысхалар сайдыылаахтар. Ол иһин биһиги хаҥатаары гынабыт”.
Оттон биир сүрүн тэрээһин Суорун Омоллоон аатынан Опера уонна балет тыйаатарыгар буолла.
“Астана күннэрин чэрчитинэн Опера уонна балет тыйаатырын 2 этээһигэр казаах култууратын көрөдөрөр быыстапка турда. Итиэннэ бэйэлэрин ааттаах-суоллаах артыыстарын илдьэ кэлэн кэнсиэр бэлэхтээтилэр”, - Ирина Гольдерова, корреспондент.
Санатан эттэххэ, былырыын Казахстаҥҥа Саха сирин күннэрэ үрдүк таһымнаахтык ыытыллыбыттара, умнуллубат өйдөбүлү хаалларыбыттара. Аны билигин Астана биллэр-көстөр артыыстара саха дьонугар, ыалдьыттарга анаан улахан бырааһынньыктааҕы кэнсиэр бэлэхтээтилэр.
Акерке Жуманбаева, Астана куоратын култуура салаатын салайааччыта: “Биһиги күүскэ бэлэмнэммиппит. Бэйэбит омукпут култууратын көрдөрөр олус интэриэһинэй бырагырааманы аҕаллыбыт. Социальнай-экономическай хайысханы эрэ сайыннарбакка култуура өттүттэн эмиэ үлэлэһиэхтээхпит дии саныыбын. Тоҕо диэтэр хаһан баҕар култуура сомоҕолуур”.
Саха сиригэр барыта Казахстаантан 150-тан тахса ыалдьыт кэлэн барда. Астана күннэрэ бырааттыы түүр омуктар ыкса сибээстээхтэрин көрдөрдө.