Ил Дархан бэйэни салайыныы уорганнарын сэбиэтин сүбэ мунньаҕын ыытта

Саха сиригэр үөрэҕирии хаачыстыбатын үрдэтии сүрүн сыал-сорук диэн миниистир Нюргуна Соколова иһитиннэрдэ. 3 сыл устата оскуоланы бүтэрээччилэри кэтээн көрүү түмүгүнэн, оҕолор үксүлэрэ, ол эбэтэр 60 бырыһыаннара эксээмэн туттаралларыгар универсальнай профили талаллара бэлиэтэннэ. Бу оҕо инники ханнык идэни баһылыан баҕарарын быһаарбакка сылдьарын көрдөрөр. Маныаха өрөспүүбүлүкэҕэ сүрүннээн техническэй хайысхалаах испиэлиистэр тиийбэттэр.

Нюргуна Соколова, СӨ үөрэҕирии миниистирэ: «Медицинэ өттүтүгэр эмиэ каадырдар инники кэмҥэ ирдэнэллэр. Хас биирдии оскуола ити өттүгэр бэйэтин кылаатын оҥоруохтаах. Сорох предметтэргэ орто кээмэйдээх баалларбыт тубуһуннулар».

Оскуоланы бүтэрээччилэр математика, физика, химия, информатика, биология предметтэрин биир кэлим эксээмэҥҥэ профильнай быһыытынан талалларыгар ааспыт сылтан былааннаах үлэ тэриллэр. Ол түмүгэр быйыл көрдөрүү үрдээн тустаах ситиһии баар. Маныаха улуустарга баһылыктар оскуола салайааччыларын кытта ыкса ситимнээх үлэни ыыталлара ирдэнэр. 

Дмитрий Тихонов, Мэҥэ Хаҥалас улууһун баһылыга: «Үөрэтии хайысхатыгар былааннаах үлэ ыытыллар уонна көрдөрүү куһаҕана суох».

Салгыы Ил Дархан Айсен Николаев салайааччылаах бэйэни салайыныы уорганнарын Сэбиэтин мунньаҕар тирэх нэһилиэктэр сайдыыларын тула кэпсэтии барда. Өрөспүүбүлүкэ үрдүнэн бүгүҥҥү туругунан тирэх пууннар испииһэктэригэр уопсайа 43 куорат, улуус киинэ киирсэр. Дойду үрдүнэн тирэх нэһилиэнньэлээх пууннары тэрийии үлэтэ ааспыт сылтан ыла барар.  

Юрий Слепцов, Нам улууһун баһылыга: «Биһиги улууспут киинигэр маастар-былаан оҥорон бүттүбүт. Билигин федеральнай, национальнай бырагыраамаларга кыттан киирэн барыахпыт диэн былаанныыбыт».

Хас биирдии тирэх нэһилиэнньэлээх пууннар маастар-былаан ылынан үлэни сүрүннүөхтэрэ. Тирэх нэһилиэктэргэ 2030 сылга диэри олох хаачыстыбатата бары хайысханан 30 бырыһыанынан үрдүөхтээх. Маныаха Олоххо-дьаһахха аналлаах инфраструктура национальнай бырайыак көмө буолуохтаах.

Владимир Новиков, Абый улууһун баһылыга: «Бу үлэ сүрүн былаана 2030 сыллаахха бүтүө уонна 2036 сылга дылы бара туруоҕа. Бу үлэ киэҥ, кыайыахха наада. Түмүгэ диэн биһи олохтоохторбут олохторугар чэпчэтии үөскэтии».

Маны тэҥэ мунньахха муницпиальнай тэриллиилэр үлэлэригэр саҥа технологияны туһаныы, чуолаан сыыппараҕа көһөрүү үлэтэ тэтимириэхтээҕин Ил Дархан бэлиэтээтэ. Хас биирдии улуус баһылыга бу хайысхаҕа тус болҕомтотун ууран үлэлиирэ ирдэнэр. Билигин федеральнай киинтэн ирдэбил күүһүрэн турар. Онон тыа сиригэр олох-дьаһах сүрүн салаалара сыппараҕа хабыллар кэмнэрэ уолдьаста.

Никита Андреев, Горнай улууһун баһылыга: «Биһиги улууспутугар министерство инновации кэлэн инвентаризация үлэтин ыыппыта. Бүгүҥҥү күҥҥэ биһиги улууспутугар сүүстэн тахса информационнай ситими кытта үлэлэһэ олоробут. Онно бэйэбит бүдьүөппүтүттэн 5-тэн тахса мөл. солк. көрүллэ турар».

Бу дьүүллэммит хайысхаларынан үлэ таһымын үрдэтэн туруорбут соруктары ситиһиллиэхтэрин наада.