Ил Дархан Айсен Николаев "Полярная звезда" оҕо сынньанар киин тутуутун көрдө

Ил Дархан Айсен Николаев оҕо сынньалаҥын киинин тутуутун бэрэбиэркэлээтэ. Күн бүгүн тутуу үлэтэ 65% таҕыста.  Эбийиэккэ иһинээҕи үлэ бара турар, барыта тоҕус биригээдэ үлэлиир.

Владимир Винокуров, тутуу биригэдьиирэ: «Ититии ситимин үлэтэ бара турар. Тутуу бэлэмэ: 7 блок бүтэн турар, ахсыска ититии ситимин туруора сылдьаллар».

Саҥа эбийиэк Өрөспүүбүлүкэҕэ улахан суолталаах бырайыак буолар. 350 миэстэлээх сылы эргиччи үлэлиир кииҥҥэ оҕо сайдарыгар, үөрэнэригэр туох баар уссулуобуйа барыта тэриллиэҕэ.

Саҥа кииҥҥэ сэттэ саастарыттан оҕолор сылдьыахтара. Хас биирди куорпус, хос анал дизайннаах, уратылаах буолуоҕа. Сынньанар, үөрэнэр анал хостор таһынан, спортивнай уонна көрөр саала баар буолуоҕа. Ордук эбии үөрэхтээһин хайысхатыгар болҕомто ууруллуоҕа.

Егор Неустроев, "Полярная звезда" оҕо сынньалаҥын киинин дириэктэри солбуйааччы: «Маннык оҕо лааҕыра ирбэт тоҥҥо соҕотох буолуо».

Ил Дархан Айсен Николаев тутуу хаамыытын көрөн, бырайыагы түргэтэтэргэ, үөскээбит боппуруостары, ыарахаттары түргэнник быһаарарга сорудахтаата.

Иван Алексеев, СӨ Үп миниистирин бастакы солбуйааччы: «Үлэһиттэри элбэтэн үлэни түргэттэтэр диэн. Быйыл сүрүн үлэтэ бүтүөхтээх».

Онон оҕо сынньанар саҥа киинэ эһиил сыл бүтүүтэ киирэрэ былааннанар. Бу баараҕай тутуу Дьокуускай куорат маастар-былааныгар киирбит биир сүрүн социальнай бырайыагынан буолар.