Хаҥалас улууһун Тойон-Арыытын тутаах киэн туттар ыаллара Варфоломеевтар

Байаан доҕуһуоллаах иис. Вера Семеновна тигэр кэмигэр маннык кэргэнэ наар ырыатынан көмө буолар. Онон мин ииһим ырыа куттаах диэн маастар астына үллэстэр. Вера Вармоломеева кыбытыктаах тигиини Саха сиригэр биир бастакынан баһылаабыт иистэнньэҥ. Онон кини бэйэтэ ураты сииктээх, көрүүлээх маастар. Ону бу тигэ сылдьар ат симэҕэр толору көрүөххэ сөп.

Вера Варфоломеева, СӨ норуот маастара: «Икки кыбытык диэн ураты. Манна ойууга киирдэҕинэ наһаа үчүгэйдик көстөр. Мантыкабын өссө үс кыбытыктааҕы боруобалаабытым, үчүгэй баҕайы».

Вера Семеновна Василий Блаженнай Соборун кыбытыктаах тигии ньыманан аттаран киэҥник аатырбыта. 16650 лоскуйтан турар оҥоһук дойдуга эрэ буолбакка, аан дойдуга тиийэ үрдүк сыанабылы ылбыта. Сатабыллаах иис сүрүн кистэлэҥэ - истиҥ сыһыан. Кини кэргэнинээн  тугу барытын бииргэ оҥороллор.  Валерий Дмитриевич дьаамсыктар сыдьааннара. Онон онно анаан кинилэр дьиэ кэргэнинэн дьаам суолун аартыгар часовня туппуттар уонна мэҥэ таас турорбуттар.  

Валерий Варфоломеев, мелодист, СӨ култуура туйгуна: «2010 сыллаахха туппуппут уонна 2013 сыллаахха мэҥэ таас туруорбуппут хаар граниттан дьаамсыыктар суоллара 250 сылыгар анаан».

Санааҥ чэпчэки, ырыа-үҥкүү аргыстаах сырыттахха туох барыта сатанарын, судургутук табылларын дьиэлээхтэр этэллэр. Холобур, кинилэр хас биирдии күннэрин гармошка тыаһыттан саҕалыыллар.

Кыбытыктаах тигиини сэргэ Вера Семеновна сахалыы сон ииһинэн дьарыктанар. Кини уус илиитинэн уонунан төрүт таҥас тигиллэн тахсыбыт. Оттон бу сону ыһыахха анаан тигэн бүтэрбит.  

Тойон-Арыы төрүт олохтоохторо үлэлэрин-хамнастарын барытын төрөөбүт дойдуларын туһугар оҥороллор. Ханна да сырытталлар Тойон-Арыыларбыт диэн киэн тутта ааттыыллар. Бэл, дойдуларынг туһунан ырыа суруйбуттар. Вера Семеновна тыллара, Валерий Дмитриевич матыыба. 

Вера Семеновна төрүт ииһи тарҕатааччы, уһуйааччы. Кини ньыматынан үөрэммит, үөрэниэн баҕалаах олус элбэх. Бу буолар төрүт дьарык быстыбат ситимэ.