Дьокуускайга норуоттар икки ардыларынааҕы "Симфония Добра" муусука бэстибээлэ саҕаланна

Норуоттар икки ардыларынааҕы "Симфония добра" муусука бэстибээлин үөрүүлээх арыллыыта. Бу курдук Опера уонна балет тыйаатарын сыанатыгар мусукааннар биллэр композитардар айымньыыларын толорон дьоҥҥо-сэргэҕэ бэлэх ууннулар.

Кинилэри кытта биир сыанаҕа муусука үрдүкү оскуолатын үөрэнээччилэрэ эмиэ тахсан саха композитора Николай Берестов биир биллэр айымньыытын толордулар. Эдэр мусукааннар маннык үрдүк таһымнаах уонна суолталаах бэстибээлгэ кыттар олус долгутулаах уонна чиэс буолар диэн этэллэр.

Сандаара Кириллина, СӨ Муусука үрдүкү оскуолатын үөрэнээччитэ: «Ис сүрэхпиттэн махтанабын маннык улахан бырайыак буолбутугар. Биһи оскуолабытыгар ынырык суолталаах маннык элбэх биллиилээх мусукааннар кэлбиттэрэ. Бүгүн оркестрга оонньуубут, кинилэри кытта оонньуурбут олус долгутуулаах».

Муусука бэстибээлэ саҕаламмытынан Ил Дархан Айсен Николаев эҕэрдэлээн туран, кыттаачыларга ситиһиилэри баҕарда. Бу куонкурс эрэ буолбакка биллилээх, уопуттаах мусукааннары, педагогтары биир сиргэ түмтэ, ситимнээтэ. Санатан этэххэ бу куонкурс нэдиэлэ устата буолуоҕа. Манна барыта 250-тан тахса кыттаачы кэллэ.

Ньургуйаана Ордахова, норуоттар икки ардыларынааҕы "Симфония добра" муусука бэстибээлин кыттааччыта: «Маннык улахан күрэххэ мин бастыкыбын кыттабын. Наһаа үөрүүлээх кэм, кыратык долгуйабын. Номнуо аҕыйах киһини кытта билистим».

Куонкурус бүгүҥҥүттэн саҕаланар. Барыта алта хайысханан, хас да былаһаакканан ыытыллыаҕа. 30-тан тахса дьүллүүр сүбэ нэдиэлэ устата кыттааччы талаанын, дьоҕурун, толоруутун көрөн сыаналыаҕа. Маны таһынан маастар-кылаастар, төгүрүк остуол, аһаҕас кэпсэтиилэр ыытыллыахтара.

Раиса Васильева, тэрийэр кэмитиэт чилиэнэ: «Муусука үрдүк оскуолатын бастакы улахан бырайыага. Аан бастаан саҕалааччынан Владимир Владимирович Путин, Уһук Илин салайааччылара уонна биһи ректорбыт Надежда Михайловна Зайкова буолар. Бэлэмнэнии тыҥааһыннаах ааспыта».

Түмүк бэс ыйын 30 күнүгэр биллиэҕэ. Бэстибээл түмүгүнэн Уһук Илиҥҥи регионна бастакы эдэр ыччат симфоническай оркестара тэриллиэҕэ.