Адьырҕа кыыл кэлиҥҥи кэмҥэ Өрөспүүбүлүкэ үрдүнэн ахсаана лаппа улаатта
Бу көстөр каадырдарга Хаҥалас улууһун Булгунньахтаах - Улахан Аан хайысхатынан суолга тыатааҕы тахсыбытын дьон устубут. Көстөрүн курдук, адьырҕа кыыл букатын чугас улуус суолугар тахсан дьону соһуталаабыт. Онтон маннык көстүү кэлиҥҥи кэмҥэ Өрөспүүбүлүкэ үрдүнэн олус элбээбит.
Бу эмиэ дьон устубут видеотыгар Усуйаана улууһугар Уус-Куйга бөһүөлэгиттэн Депутатскай бөһүөлэгэр айаннаан иһэр айанньыттар тыатааҕыны көрбүттэрин устубуттар. Хоту улууска адьырҕа кыыл туох да эҥкилэ суох хаама сылдьар эбит буоллаҕына, Илин эҥэргэ Таатта улууһун Туора-Күөлүгэр олох даҕаны оҕолоох эһэ олохтоох нэһилиэнньэни аймаабыт. Дэриэбинэ дьаһалтата иһитиннэрэринэн адьырҕа кыыллары бултаһарга булт департаменыттан лицензия ылыллыа.
Иннокентий Семенов Биологическай ресурсалар дирекциятыгар үйэтин аҥарын үлэлээбит, үрүдукү кылаастаах исписэлиис бэлиэтииринэн билигин тыатааҕы саамай хаамар, миэтэтин, аһыыр сирин булар кэмэ. Онон бу кэмнэргэ үгүс дьон адьырҕа кыылы онно-манна көрүөн сеп.
Иннокентий Семёнов, СӨ Биологическай ресурсаларын, айылҕа ураты харыстанар сирдэрин уонна айылҕа пааркаларын дириэксийэтин дириэксийэтин диэриэктэри солбуйааччы: «Билигин сайын гон кэмэ буола турар. Суол, вахтовай бөһүөлэк таһыгар сүрүнүн эдэр эһэлэр сылдьаллар».
Биллэн туран, адьырҕа кыыл киһиэхэ саба түһүөн сөп диэн исписэлиистэр тоһоҕолоон этэллэр. Тыатааҕыны көрсүбүт түгэҥҥэ уолуйумуохха, куттанымыахха наада. Маныаха сүүрүүмүөххэ-куотумуохха, хараҕын утары көрүө суохтааххыт. Тыаһы -ууһу таһаарар тоҕоостоох.
Иннокентий Слепцов, СӨ Биологическай ресурсаларын, айылҕа баайын харыстыыр дирекция булт салаатын салайааччыта: «Бүгүҥҥү туругунан 176 быһаарыы тахсан турар. Куттал үөскээтэҕинэ сирин үөрэтэллэр уонна сөптөөх быһаарыы таһааран экология министиэристибэтин нөҥүө быһаарыы тахсар».
Тыатааҕы нэһилиэнньэлээх пууннарга мэнээктээбит тугэнигэр адьырҕа кыылы кэтиир-маныыр анал салалта аатыгар сайыбылыанньа суруллан, бу хайысхаҕа үлэ барар. Быйыл номнуо 170-тан тахса быһаарыы тахсыбыт.
Маныаха эһэ ахсаанын ааҕыы үлэтэ тиһигин быспакка ыытылла турар. Олохтоох булт инспиэктэрдэрэ ааҕыы-учуот үлэтин оҥороллор.