Саха сиригэр норуоттар икки ардыларынааҕы "Симфония Добра" куонкурс саҕаланна

Муусука кэрэ эйгэтин бэстибээлэ Уһук Илин уонна Азия эдэр талааннаахтарын Саха сиригэр түмтэ. Норуоттар икки ардыларынааҕы Симфония добра куонкурс аан бастакытын ыытыллар. Манна барыта 250-тан тахса кыттааччы кэллэ.

Куонкурус алта хайысханан, хас да былассаакканан ыытыллыаҕа. Манна барыта 30-тан тахса дьүллүүр сүбэ нэдиэлэ устата кыттааччы талаанын, дьоҕурун, толоруутун көрөн сыаналыаҕа.

Моисей Дьячковскай, СӨ Муусука үрдүкү оскуолатын үлэһитэ: «12 саастарыттан үөһээ кыттыахтарын сөп. 6 хайысха киирэр: струннай, духовой, вокал».

Муусука үрүдүкү оскуолатын биир туйгун үөрэнээччитэ Ситора Потапова  бу куонкурска икки хайысхаҕа кыттар. Кини маннык таһымнаах куонкурстарга куруук кыттар буолан долгуйбат, бэлэмим үчүгэй диэн этэр.

Ситора Потапова, СӨ Муусука үрдүкү оскуолатын үөрэнээччитэ: «Долгуйбаппын. 5 кылаастан кларнекка үөрэнэбин».

Саамай элбэх кыттааччылаах делегация Монголия буолар. Кинилэр бары хайысхаҕа кытталлар. Бу куонкурс эрэ буолбакка уопут атастаһыы, доҕордоһуу уонна сомоҕолоһуу биир көрүнэ диэн этэллэр.

Шараф Царян, Монголиятааҕы государственнай консерватория ректора: «Готовимся, ждем хорошего музыкального праздника. Очень рады, что наши дети будут знакомиться с музыкой Якутии и они будут дружить с молодыми музыкантами с Якутии и с других регионов России».

Куонкурус сүүмэрдиир түһүмэҕэ өссө саас саҕаламмыта, онно барыта тыһыынчаттан тахса сайаапка киирбитэ. Онон түмүктүүр түһүмэххэ бастыҥтан бастыҥ кыттааччы кэллэ.

Моисей Дьячковскай, СӨ Муусука үрдүкү оскуолатын үлэһитэ: «Куонкуруспут сүрүн сыала – бастакы молодежнай симфоническай оркестр Уһук Илин үрдүнэн оҥоһуллуохтаах. Онно кыайыылаахтарбыт, лауреаттарбыт киириэхтээхтэр. Ол оркестрбыт Уһук Илин куораттарынан барытынан оонньуохтаах».

Симфония Добра куонкурс сарсынныттан саҕаланар. Кыайыылахтары быһааран, түмүк бэс ыйын 30 күнүгэр биллиэҕэ.