Үөрэххэ киириигэ докумуону тутар хампаанньа үлэтин саҕалыыр

4 сыллаах үөрэх түмүктэнэн, диплом тутуу үөрүүтэ.  Таатта улууһуттан төрүттээх Зинаида Баярова саха салаатын бүтэрэн филогог идэтин баһылаата. Үрдүк үөрэх кыһатын бүтэрбит эдэр исписэлиис саҥа туттарсааччыларга хорсун буоларга сүбэлиир.

Зинаида Баярова, ХИФУ саха салаатын выпускнига: «Таптаабыт үөрэххитигэр харса суох туттарсан иһин. Киириэм суоҕа диэн толлон туруман. Барыта сатаныаҕа. Биһиги бүтэрдибит, эһиги эмиэ бүтэриэххит».

Ким эрэ үөрэҕин бүтэрэр, онтон ким саҥа туттарсар түбүгэр сылдьар. Саха сирин сүрүн үөрэҕин кыһатыгар - Хотугулуу-Илиҥҥи федеральнай университекка тутар хамыыһыйа үлэтин саҕалаата. Бүлүү улууһун Хампатыттан кэлбит Айталина Степанова юрист идэтин баһылыыр соруктаах. 

Айталина Степанова, үөрэххэ туттарсааччы: «Хампа оскуолатын бүтэрдим уонна бу юридическэй коллежка докумуоннарбын туттардым».

Айталина ийэтин кытта докумуонун туттарда. Аны барыта биллэн хаһан түмүк тахсарын күүтэллэр.

Лена Степанова, төрөппүт: «Кыра эрдэҕиттэн юрист буолуон баҕарар. Докумуоннарбытын туттардыбыт, устудьуон буолуо диэн эрэнэбит».

2025-2026 сыллааҕы үөрэх дьылыгар бакалавриакка уонна специалитекка барыта 167 үөрэх программатынан уонна магистратуураҕа 76 үөрэх программатынан устудьуоннары үөрэтиэхтэрэ. Быйылгы дьылга саҥа идэлэр эбилиннилэр.

Елизавета Ильина, ХИФУ тутар хамыыһыйатын эппиэттээх сэкэрэтээрэ: «Саҥа специалитет – информационная безопасность автоматизированных систем диэн арылынна. Ити 5,5 сыллаах үөрэх буолар».

Барыта 4 тыһыынчаттан тахса бюджет миэстэтэ көрүлүннэ.Бу сылга Госуслуги портал нөҥүө докумуоннары туттарыы хайысхата кэҥээбит. Ол курдук эрдэ бакалавриат уонна специалитет эрэ таһымнарыгар Госуслуги неҥүө докумуону тутар эбит буоллахтарына, быйыл магистратура уонна аспирантура эбиллэн биэрбит. Физико-техническэй институт биир саамай куонкурустаах үөрэҕинэн билллэр.

Виктория Лонгинова, физико-техническэй институт старшай преподавателэ: «Быйыл үөрэх дьылыгар бакалавриат бырагыраамаларыгар 8 араас хайысхаҕа ылабыт. 200 курдук бүдьүөт миэстэлээхпит».

Статистика чахчытынан, туттарсааччы 80 бырыһыана Госуслуги порталынан докумуонун туттарар. Чэпчэтиинэн туһанааччылар туспа куонкуруһу ааһаллар.

Университет киин тутар хамыыһыйата Кулаковскай уулуссатыгар баар сүрүн куорпуһун бастакы этээһигэр дьиэлэнэр.