Орто дойду зоопаркатыгар бизоннар уонна овцебыктар эбилиннилэр

Бизоннар эбиэттэрин кэмэ. Саргуля уонна Ильюша зоопаркаҕа олорбуттара тохсус сыллара, онон дьоҥҥо-сэргэҕэ үөрүйэхтэр, элбэх киһиэхэ кыһаммакка холкутук аһыыллар. Быйыл бизон дьиэ кэргэҥҥэ үөрүүлээх эбиллии.

Ыйын да туола илик бизон киилэтэ 20-тэн тахса эрэ. Ол эрэн сотору улаатан, уһаан барыаҕа. Кини билигин ийэтин үүтүн иһэр уонна күүс эбинээри утуйан тахсар. Санатан эттэххэ, бизон 2 миэтирэҕэ тиийэ уһуур уонна 800 киилэҕэ тиийэ улаатар.

Анастасия Габышева, "Орто дойду" кыылы тутар паарка үлэһитэ: «Кыһыннары, сайыннары отунан аһатабыт. Сенаж биэрэбит, сиилэс. Сүрүн астара от. Битэмиин, үөн түһэрэри барытын биэрэбит».

Бизоннартан ыаллыы олорор овцебыктарга эмиэ быйыл эбиллии. Быйыл кинилэр бастакы оҕолоро буолан, кими да чугаһаппаттар, онон зоопарк үлэһиттэрэ билиҥҥээнни диэри тыһытын, атыырын билбэттэр.

Анастасия Габышева, "Орто дойду" кыылы тутар паарка үлэһитэ: «Оҕото аһылык кэннигэр саһа сытар, ол иһин ийэтэ хаама сылдьар, бастакы оҕото буолан көҥөнөр».

Бу курдук Орто дойду зоопаркатыгар олох оргуйан олорор. Кыыллар кыстыктары этэҥҥэ ааһан, сайыҥҥы сезоҥҥа үүктэннилэр. Билигин дьон-сэргэ зоопаркаҕа саамай сылдьар кэмнэрэ.

Оттон бу зоопарка сулустара Колымааналаах, Яна. Эбиэттэрин кэннэ холкутук сөтүөлүү сылдьаллар. Үлэһиттэр этэллэринэн Яна мэник, сонумсах, биир сиргэ сатаан олорбот.

Билигин кинилэр саамай аһыыр кэмнэрэ. Астарын рационнарыгар хааһыттан саҕалаан фруктаҕа тиийэ көрүллөр.

Артур Кривошапкин, зоолог: «Күннээҕи рационнара – 35 киилэҕэ диэри балык, битэмииннээх балык сыата уонна килиэп сииллэр».

Инниктин зоопарка кэҥиир былааннаах. Ол курдук,  адьырҕа кыыллар турар сирдэригэр туйахтаах кыыллары тутуохтара. Оттон эһэлэргэ тэйиччи киэҥ-куоҥ сиргэ саҥа вольер оҥорор былааннаахтар.