Уу суолунан мөлүйүөнтэн тахса туонна таһаҕас тириэрдиллиэ

Бырабыыталыстыба Бэрэссэдээтэлин бастакы солбуйааччы Дмитрий Садовников тустаах хамыыһыйа мунньаҕар быйылгы навигация кэмигэр таһаҕаһы тиэрдии балаһыанньатын ырытта. Мунньах кыттыылаахтара өрүстэр туруктарын, оттугу, уматыгы тиэрдии, флот, чох шахтатын үлэтин дьүүллэстилэр. Өрөспүүбүлүкэ өрүстэринэн навигация саҕаланыаҕыттан уопсайа 240 тыһыынчаттан тахса туонна олоҕу-дьаһаҕы хааччыйар таһаҕас тиэйилиннэ. Бу көрдөрүү уопсай былаантан 21% ылар. Оттон быйылгы сыллааҕы былаан туһунан этэр буоллахха, бу сайын устата уунан уопсайа 1 мөлүйүөнтэн тахса туонна таһаҕаһы тиксэрэр соруктаахтар.

Семён Коркин, СӨ транспорт уонна суол-иис хаһаайыстыбатын миниистирин солбуйааччы: "Бу күҥҥэ Аммаҕа таһаҕас тиэйиитэ түмүктэннэ. Ол курдук Хабарыкы хайатыттан таас чох саппааһа кэллэ. Бүлүү бөлөх улуустарыгар таһаҕаһы таһыы салҕанар. Уопсайа 90 тыһыынча туонна тиийиэхтээҕиттэн  80% туолла. Быйыл Бүлүү бөлөххө уу элбэх. Бу уу суолугар үчүгэйэ суох. Тиксэр сирдэр уу түһэн чоҕу тиэйии бара турар" . 

Бу нэдиэлэ бүтүөр диэри өссө Бүлүү бөлөх улуустарыгар 10-ча тыһыынча тонна чох тиэрдиллиэхтээх. Чоҕу таһынан газоконденсат, метанол тиксэриитэ салҕаныаҕа. Уу таһыма үрдээһинэ, ону тэҥэ түһүүтэ эмиэ үгүс кыһалҕаны үөскэтэр. Халыматааҕы суудуна  хампааньата бастакы рейстэрин оҥорон саҕалаата. Дьааҥынан Нижненск-Усть Куйга маршрутунан эмиэ бастакы суудуна таҕыста. Бу сыллааҕы навигацияҕа үгэс быһыытынан сүүһүнэн суудуна, флот, техническэй флот уонна  уонунан порт кыраана туһаныллар.

Дмитрий Лепчиков, СӨ гражданскай көмүскэл уонна нэһилиэнньэ олоҕор-дьаһаҕар куттал суох буолуутун хааччыйыы миниистирэ: "Бүгүҥҥү күҥҥэ уопсайа 195 тыһыынчаттан тахса туонна тириэрдилиэннэ, бу уопсай былаантан 17 %.  Тыын суолталаах таһаҕас 104 тыһыынча туонна". 

Навигация бастакы түһүмэҕэ түмүктэннэ. Биллэн турар, эбии тиксэр сирдэри оҥоруу, үп-харчы курдук уустук боппуруос элбэх, ол эрээри үлэ былаанынан барар. Саха сиригэр хотугу тиэйии уратыта диэн таһаҕас сүрүн кээмэйэ кылгас навигация кэмигэр өрүс суолунан тиэллэн, салгыы кыһыҥҥы суолларынан тиэрдиллэр.  Бу сыл ахсын чуолкай систиэмэни уонна анал хонтуруолу ирдиир олус уустук тэрээһин буолар. От ыйын ортотуттан арктическай навигация саҕаланыаҕа.