Туймаада ыһыаҕын бырагыраамата кэҥиир

Саха дьоно олус кэтэһэр Туймаада ыһыаҕа буолара аҕыйах хонук хаалла. Бу ыһыахха ыраахтан, чугастан, өрөспүүбүлүкэттэн эрэ буолбакка, атын регионартан, аан дойдуттан тиийэ элбэх ыалдьыт кэлэр. Билигин ыһыах буолар сиригэр Үс Хатыҥҥа бэлэмнэнии  үлэтэ тэтимнээхтик бара турар.

“Аҕыйах хонугунан Туймаада ыһыаҕа ыытыллыаҕа. Манна саҥардыы, өрөмүөн үлэтэ тохтообокко ыытыллар. Көрөөччүлэргэ эбии олорор миэстэ бэлэмнэнэр”.

Онон "Тунах" түһүлгэтигэр эбии 400 олорор сир эбиллиэ, маны таһынан "Оһуохай" түһүлгэтигэр саҥа балаҕан тутуллан киириэҕэ. Тутуу үлэтэ бу нэдиэлэҕэ түмүктэниэҕэ.

Николай Попов, тутааччы: “Биһиэхэ тутууну түмүктүүргэ болдьох биэрбиттэрэ. Онон ардаҕы ардах диэбэккэ үлэлии сылдьабыт”.

Маны таһынан киирэр суоллары тупсарыы, кэҥэтээһин үлэлэрэ бараллар. Быйыл эбии дьону тиэйэр оптуобустар ахааннарын элбэтиэхтэрэ, уопсастыбаннай бэрээдэк харыстабылыгар уонна куттал суох буолуутун хаччыйыыга миэрэлэр күүһүрүөхтэрэ.

Евгений Григорьев, Дьокуускай куорат баһылыга: “Терроризмы утары бэрээдэгинэн ыһыах күннэригэр мобильнай сибээс суох буолар. Онон эрдэттэн бар дьоммутун сэрэтэбит. Терроризмтан сэрэхтээх буолуу быйыл ыһыах кэмигэр күүһүрүө. Ол курдук эвакуатордар, ИДьМ күүскэ лэлиэхтэрэ. Дьон сөпкө уонна куттала суохтук сынньанара сүрүн сорукпут”.

Туймаада ыһыаҕар 100-тэн тахса култуура тэрээһиннэрэ, итиэннэ спортивнай күрэхтэр ыытыллыахтара. Маны таһынан оҕо айар былаһааккалара үлэлиэхтэрэ, улахан экраҥҥа саха киинэлэрин көрдөрүөхтэрэ. Быйылгы ыһыахха элбэх, сонун тэрээһиннэр эбиллиннилэр. 

Сардаана Брызгалова, Дьокуускай куорат култуураҕа уонна духуобунай сайдыыга салалтатын салайааччы: “Икки саҥа күрэх баар. Ол курдук туой маастардарын күрэҕэ уонна “Туймаада Куо” диэн куонкурус. Бу күрэх уонтан тахса сыл буолан баран сөргүтүлүннэ. Итини сэргэ “Оҕо түһүлгэтигэр” 2 тыһыынчаттан тахса оҕо кыттаары бэлэмнэнэ сылдьар”.

Оттон биир саамай сүрүн уонна күүтүүлээх күрэхтэһиинэн “Тыгын оонньуулара" буолаллар. Сыл бастыҥ национальнай күрэҕэр барыта 16 бөҕөс күөн көрсүөҕэ. Быйыл оонньуулар ыытыллыбыттара 30 сыла, онон тэрийээччилэр улахан бириистэри бэлэмнээтилэр.  

Эдуард Ефимов, Дьокуускай куорат физическэй култуура уонна спорт салалтатын салайааччы: “Быйылгы үбүлүөйдээх сылга өбүгэ оонньуутугар хапсаҕай, оҕунан ытыы, мас тардыһыыта буолуо. Ону “Бэргэн оонньуулара” буолуо. Онно 8 оҕо сүүмэрдэммитэ”.

Туймаада ыһыаҕа бэс ыйын 28-29 күннэригэр үгэс быһыытынан Үс Хатыҥҥа буолуоҕа. Быйылгы ыһыах Улуу Кыайыы 80 сылыгар, Арассыыйаҕа Аҕа дойду, Саха сиригэр Ийэ дойду көмүскээччилэрин сылларыгар ананыаҕа.