ГТРК «Саха» хампаанньа тэрийбит "Мин төрөөбүт дьиэм" айар күрэх түмүгэ таҕыста
«Мин төрөөбүт дойдум» айар күрэхпит сүрүн кыайыылаахтарынан Гран При хаһаайыннарынан Сунтаар нэһилиэгин 3 №-дээх орто оскуолатын үөрэнээччилэрэ уонна учууталлара устубут "Кыайыыны уһансыбыт буойун-учууталлар" диэн видеороликтара буолла.
Оскуола күрэх саҕаламмытыгар тута 2 үлэни ыыппыта, биирдэстэрэ кыайыылааҕынан таҕыста. Аҕа дойду сэриитигэр Сунтаар улууһуттан үлэлии-хамныы сылдьар 112 эдэр учуутал аттаммыта, олортон 49 учуутал уоттаах сэрии толоонугар хорсуннук охтубута.
Туяра Алексеева, "Эйгэ" фольклор бөлөҕүн салайааччыта, эбии үөрэхтээһин педагога: “Оҕолор ылынан оонньуулларыгар саҥаларын-иҥэлэрин чочуйарга уонна таҥас-сап көрдүүргэ төрөппүттэри кытта үгүс элбэх үлэ барбыта. Операторы кытта сүбэлэһэн сценарий суруллубута. Итиэннэ дьон сэргэ сэҥээриитин ылар видеоролик таҥыллан тахсыбыта”.
Сунтаар нэһилиэгин 3 №-дээх орто оскуолата 5 сылын "Иэс, чиэс, ытыктабыл" диэн Аҕа дойду сэриитин, сэригэ кыттыбыт саха-буойуннарын туһунан билиһиннэрэр бырайыак тэрийэн үлэлэтэр. Бырайыакка учууталлар, оҕолор, төрөппүттэр бэрт көхтөөх кыттыыны ылан сэриигэ сылдьыбыт, кыайыыны уһансыбыт чугас дьоннорун ааттарын үйэтитиигэ матырыйаал хомуйан, тэттик видеолары усталлар.
Быйылгы куонкурус ис хоһооно Улуу Кыайыы 80 сылыгар ананна. Араас улуустартан барыта уонунан сахалыы, нууччалыы тылынан видеоролик, кэпсээн, хоһоон үлэлэр киирдилэр. Гран Прины тэҥэ 1 степеннээх Лауреат аатын сэрии бэтэрэнэ Прокопий Никифорович Попов туһунан видео кэпсээн ылла. Кэпсээни кини сиэттэрэ оҥорон бэлэмнээбиттэр. Прокопий Никифорович сэриигэ баран бастаан сураҕа суох сүппүтүнэн ааҕылыбыта, онтон кэлин 2015 сыллаахха чугас дьоно ирдээн Володарскай оройуоҥҥа бырааттыы көмүллүүгэ баарын булан, аатын үйэтиппиттэрэ. Лауреаты тэҥэ, өссе 3 үлэ тустаах номинацияларынан бэлиэтэннэ.
Руслана Максимова, "Саха" ГТРК шеф-редактора: «Быйылгы күрэххэ профессиональнай таһымнаах элбэх үлэ киирдэ. Ол эрэн биһиги уһуллуу таһымыгар болҕомтону уурбатыбыт. Үлэ ис хоһоонунан сыаналаатыбыт. Хас биирдии үлэ ис дууһаттан оҥоһуллубута тута харахха быраҕыллар. ».
Бу курдук биһиги биир дойдулаахтарбытыттан Аҕа дойду сэриитин кыттыылаатарын, Улуу Кыайыны уһансыбыт тыыл бэтэрээннэрин, ыар кэмҥэ улааппыт сэрии оҕолорун туһунан кэпсээннэрин, видеоларын, хоһооннорун туттубут. Күрэх балаһыанньатын быһыытынан, кыайыылаахха дойдутугар тиийэн кинилэр тустарынан биэрии бэлэмниибит. Быйыл устар бөлөхпүт Сунтаар улууһун Сунтаар нэһилиэгэр айанныаҕа.