Сабантуй үрдүк таһымҥа ааста

Бу улахан казааҥҥа татаардар национальнай бүлүүдэлэрэ "Шурпа" буһа турар. Манна 12 бараан сибиэһэй этэ киирэр, онон хойуу ураты амтаннаах миин буолар. Бу бүлүүдэни амсайаары дьон-сэргэ халын уочаракка турда.

Антонина Алёнова, Дьокуускай куорат олохтооҕо: "Бырааһынньык тэриллибит. Быыстапканы киирэн өссө көрө иликпит. Босхо бэриллэр мииннэрин иһээри кэтэһэн турабыт".

Асчыттар этэллэринэн, бу бүлүүдэ 4 тыһыынча киһиэхэ тиийэр гына астанар, онон барыларыгар тиксиэҕэ. Маны таһынан улахан 300 лиитэрэлээх сылабаарга оттоох чэй оргуйа турар.

Онтон өссө биир татаардар нациоанльнай сүрүн бүлүүдэлэрэ чак - чак буолар. Бу бүлүүдэ хас да араастаах буолар. Татаар норуота хас биирдии киһини айах тутан көрсөр, аһатан маанылыыр. 

Дьокуускай куорат Хомсомуол болуоссатыгар федеральнай Сабантуй үөрүүлээх арыллыыта. Сабантуй арыллыытыгар Ил Дархан Айсен Николаев уонна Татарстан Раиһа Рустам Минниханов кыттыыны ыллылар.

Айсен Николаев, СӨ Ил Дархана: “Үйэлэргэ норуоттар доҕордоһуудара дойду сайдыытын көҕүлүүр. Биһиги биир түүр омуктар, саха норуота уонна татаар норуота итиэннэ атын да омуктар доҕордоһуубут куруутун күүстээх”.

Татарстаан ааттаах-суоллаах артыыстара кэнсиэр тэрийдилэр, норуот маастардара бэйэлэрин оҥоһуктарын быыстапкаҕа көрдөрүүгэ туруордулар. Оттон саамай элбэх көрөөччүлээх спортвнай күрэхтэр буоллулар. 

Элбэх норуоттаах дойду духуобунай түмсүүтүн бөҕөргөтөргө туһуламмыт федеральнай Сабантуй сыллата Арассыыйа регионнарынан көһө сылдьан ыытыллар. Быйыл үбүлүөйдээх тэрээһин Саха сиригэр ыытыллыбыта улахан суолталаах. 

Сергей Местников, СӨ Бырабыыалыстыба бэрэссэдээтэлин солбуйааччы: “Бэйэ икки ардыгар уопут атастаһан, инникитин саҥа хайысхалары талар сыаллаахпыт. Бүгүн ол туһунан кэпсэтии ыытылынна. Култуура, искусство, экономика, промышленность эйгэтигэр биһиги доҕордоһуубут өссө бөҕөргүү, кэҥии туруо диэн эрэллээхпит”. 

Икки күн устата хас да былаһаакканан араас хабааннах тэрээһиннэр тохтообоко ыытыллыннылар. Сабантуйга барыта 700-тэн тахса ыалдьыт Татарстаан Өрөспүүбүлүкэтиттэн кэлэн бэйэтин култууратын, төрүт үгэһин билиһиннэрдэ. Аны эһиил федеральнай Сабантуй Омскай уобалаһыгар ыытыллыаҕа.