Нацбырайыак чэрчитинэн суол өрөмүөнэ салҕанар

Аэропорт оройуона, Севастопольскай уулусса. Муус устар ыйтан бу суолга капитальнай өрөмүөн үлэтэ саҕаланан бара турар. Биир километр кэриҥэ усталаах суол, чопчу эттэххэ 986 миэтэрэ уһуннаах суол бүтүүннүү төрдүттэн көтүллэн саҥардыллар. Бү үлэлэргэ куорат дьаһалтата 204 мөлүйүөн үбү көрөн турар. Өрөмүөн Курнатовскай уулуссатыттан Октябрь 50 сыла Автострада суолга диэри тардыллар.

Борис Слепцов, прораб: «Уу лотоктарын оҥоро сылдьабыт. Аспаал уураары бэлэмнии сылдьабыт».

Ууну ыытыы куорат биир саамай кыһалҕалаах хайысхата. Онон бу үлэҕэ улахан болҕомто ууруллар. Бу Севастопольскай уулусса оҥоһуутугар ууну ыытыы  биир сүрүн үлэнэн буолар. Тоҕо диэтэр уу сатаан барар буоллаҕына эрэ, суол өр кэмҥэ сулууспалыыр,  асфаал бүрүөһүнэ түргэнник алдьаммат. Бу маннык тустаах лотоктары бэлэмнээн билигин үлэ бара турар. Бастаан траншея хаһыллар, салгыы лотоктары монтажтаан оҥороллор.

Эргэни көтүрэн саҥаны саҕалаан. Техникэ эргэ тутууну демонтажтыыр, онтон саҥа тротуар оҥоһуутугар сирин тэҥниир.

Манна айан-сырыы хааччахтамматын туһуттан суолу бүтүүннүү саппакка үлэлэри түһүмэхтэринэн ыыталлар.

Борис Слепцов - прораб: «Түһүмэҕинэн суолу сабабыт, Курнатовскайтан Можайскайга дылы сабыллан турар. 600 м. курдук».

Үлэ бүтэр болдьоҕо альтынньы, сэтинньи ый. Онуоха диэри саҥа аспаалы тэлгээн үлэ барыта үмүрүйүөхтээх. Быйыл куорат үрдүнэн 13 суолу өрөмүөннүөхтэрэ, уопсайа 15 аҥар километр саҥардыллыаҕа. Өссө биир бөдөҥ өрөмүөн үлэтэ Хабаров аатынан уулуссаҕа ыытылла турар. Манна Ярославкай уулуссатыттан Богатырев уулуссатыгар диэри кэрчик суол өрөмүөннэр. Суолу кытта сатыы сылдьар дьон сирин - тротуары эмиэ оҥороллор. 

Мичил Сивцев, суол үлэһитэ: «Сүрүн эбийиэкпит Хабарова уулусса. Суол үлэһиттэр үлэлэрэ уларыйа сылдьар күн аайы».

Ону тэҥэ, Ойуунускай уулуссата эмиэ капитальнай өрөмүөннэнэ сылдьар, бу суол оҥоһуутугар 810 мөлүйүөнтэн тахса үп тыырыллыбыт. Суол Дежнев уулуссатыттан Октябрьскайга диэри барар учаастагын оннуттан оҥоро сылдьаллар.