Анал байыаннай дьайыыга сылдьар биир дойдулаахтарбытыгар көмөнү оҥоруу тохтообот

Бу курдук амарах санаалаах волонтердар байыастарга анаан хомуллубут гуманитарнай көмөнү ыытаары бэлэмнииллэр. Бу көмө Өрөспүүбүлүкэ хас да улууһуттан хомуллан кэлбит.

Оттон иистэнньэннэр анал байаыннай дьайыы кытытылаахтарыгар анаан сайыҥҥы таҥас тигэллэр. Күн бүгүн волонтердар ыстааптарыгар 40-тэн тахса иистэнньэн үлэлии-хамсыы сылдьар.

Надежда Иванова, волонтёр: «Хамаандабыт манна куруук 40-тан тахса киһи сылдьар. Сиэккэ баайабыт, иистэнэбит. Уолаттарбыт көмө тутан баран суруйаллар».

Ыстаап бу сыл саҕаланыаҕыттан барыта сэттэ туонна гуманитарнай көмөнү ыытта. Үтүө дьыала тиһигин быспакка салҕанар. Маннык көмөлөһүү байыастарга, уолаттарбытыгар  күүһү-уоҕу бөҕүргэтэр, санааларын күүһүрдэр диэн этэллэр.

Анна Ефимова, “Якутия с тобой” хамсааһын бэрэссэдээтэлэ: «80 кв.м. сиэккэ бааллынна танкистарга. Ону таһынан нэһилиэнньэттэн хомуллубут көмө барыаҕа. Куурскай уобаласка Уус Алданнар наһаа элбэх көмөнү аҕаллылар».

Бу курдук хас биирдии Саха сирин олохтооҕо бары түмсэн анал байыаннай дьайыы кыттыылаахтарыгар бэйэлэрин көмөлөрүн ууран, сэмэй кылааттарын киллэрэллэр.

Үөһээ Бүлүү улууһун салалтата, олохтоохторо байыастарыгар ис сүрэхтэриттэн ыалдьаллар. Бу соторутааҕыта улуус делегацията Саха сирин байыастарыгар тиийэн гуманитарнай көмөлөрүн тиэртилэр. Маны таһынан 200-чэкэ киилэ көмөнү балыыһаларга, эмтэнэ сылдьар байыастарга тиксэрдилэр.

Арыйаана Михайлова, Үөһээ Бүлүү улууһун уопсастыбаннай палаата чилиэнэ: «Улууспут волонтердара тикпит рюкзактара, плащ-палаткалара уонна сиэккэлэрэ анал байыаннай дьайыы сиригэр ыытылла тураллар».

Саха ыччата дойдуларын көмүскэлигэр сылдьаллара барыбытын долгутар, бары түмсэн ыраахтан да буоллар төһө кыалларынан күүс-көмө, өйөбүл буолабыт.