Дьокуускайга Оҕо көмүскэлин күнэ киэн далааһыннаахтык ааста

Кэлэр кэнчээри ыччаппыт, үүнэр көлүөнэбит сырдык бырааһынньыгын сыллата киэҥ далааһыннаахтык бэлиэтиибит. Бу күн киин куорат сынньалан пааркатыгар оҕолорго анаан хас да былаһаакканан,  хайысханан арахсан тэрээһиннэр ыытыллыннылар. 

Сылын аайы тэрийээччилэр оҕо көмүскэлин күнүн уратытык тэрийэн ыыталлар. умнуллубат түгэннэри, сынньалаҥы бэлэхтииллэр.

Нюргуна Соколова, СӨ үөрэх уонна наука миниистирэ: «Иитии боппуруоһугар кыттааччы тэрилтэлэрбит бэйэлэрин тэрээһннэрин ыыттылар. Инники идэлэригэр, наука, искусство, спорт өттүнэн маастар-кылаастар ыытылла тураллар».

Оттон Туймаада стадионугар Сайын диэн оҕо бэстибээлэ ыытыллынна. Манна оҕолор бэйэлэрин наукаҕа, спортка, үнкүүгэ уонна да атын көрүҥэ холонон көрдүлэр.

Мария Бессонова уонна Карина Солдатова: «Наһаа үчүгэй бэстибээл, кэнсиэр кэтэһэбит. Артыыстар, аниматордар, фокусниктар бааллар уонна үчүгэй баҕайы маастар-кылаастар буола сылдьаллар. Кыра оҕолорго анаан араас оонньуулар буолбуттара».

Бу күн тэрилтэлэр, эбии үөрэхтээһин кииннэрэ бары биир сиргэ түмсэн оҕо сайдарыгар туһуланар маастар-кылаастары, араас куонкурстары ыыттылар. Маны таһынан сайыҥҥы сынньаланнарын туһалаахтык атааралларыгар үөрэхтэри, лааҕырдары билиһиннэрдилэр.

Туйаара Ощепкова, Дьокуускай куорат олохтооҕо: «Үчүгэй баҕайытык тэрийбиттэр. Музыкальнай оскуолаҕа уонна балетнай студияҕа набор буола турар эбит, ону интириэһиргээтибит. Тэрийээччилэргэ махтанабыт».

Саха сирэ Уһук Илин федеральнай уокуругар нэһилиэнньэ эбиллиитинэн инники күөҥҥэ сылдьар. Биллэн турар дьиэ кэргэн өйөбүлэ инники күөҥҥэ. "Үйэ оҕолоро" хапытаал быйылгыттан 116 тыһыынчаҕа тэҥнэстэ. Оттон үһүс уонна онтон төрөөбүт оҕолорго бэриллэр "Дьиэ кэргэн" өрөспүүбүлүкэтээҕи ийэ хапытаала 316 тыһыынчаҕа тэҥнэһэр. Күн бүгүн Өрөспүүбүлүкэ үрдүнэн 34 тыһыынчаттан тахса элбэх оҕолоох дьиэ кэргэн олорор.