Быйыл халлаан эрдэ сылыйан, дьылбыт эрдэлээтэ
Синоптиктар сабаҕалыылларынан быйыл ааспыт сылга курдук, бэс ыйыгар иккис, үһүс, сорох сирдэргэ төрдүс, оннооҕор бэһис кылаастаах баһаардар бэлиэтиниэхтэрин сөп. Даҕатан эттэххэ, быйыл ойуур баһаардара ордук сэрэхтээх кэм инниттэн күөдьүйбүттэрэ. Ол эрэн, бу күн-дьыл туругуттан буолбакка дьон дьалаҕай сыһыаныттан тахсыбыттара. Эрдэ сылыйан үгүс киһи тыаҕа сынньана тахсара элбээбитэ, билигин да сынньанааччы үгүс. Маныаха ыксаллаах быһыы-майгы министиэристибэтин инспиэктэрдэрэ көҥүллэнэр сирдэргэ эрэ сынньанын диэн сүбэлииллэр.
Ким Кузьмин, ЫБММ Саха сиринээҕи салалтатын Дьокуускай куораттааҕы баһаары утары кэтиир-хонтуруоллуур салаатын инспиэктэрэ: «Куорат нэһилиэнньэтэ маассабай сынньанар миэстэлэр быһаарыннылар. Чопчу эттэххэ, микрорайон Кангалассы, чоҕу тиэйэл причал кэннигэр, уонна Покровскай тракт 20км. Ол миэстэлэргэ ханнык баҕар бириэмэҕэ көҥүллэнэр, ол гынан баран аһаҕас уоту оттор сатаммат».
Онон ойуур баһаарын күөдьүппэт туһуттан көҥүллэнэр эрэ сирдэргэ итиэннэ аһаҕас уоту оттубакка сынньанар ирдэнэр. Сыл ахсын Саха сиригэр араас төрүөттэн тыаларга уот тахсар. Бу бастатан туран айылҕаҕа улахан хоромньуну таһаарар.
Ирбэт тоҥу анаан-минээн үөрэтэр институт учуонайа Александр Николаевич Федоров Сахабыт сирин климатын биир саамай уратытын графикаҕа оҥорон көрдөрөр. Ирбэт тоҥмут уларыйыыта 11 сыллаах циклынан барар. Итиэннэ кыһыҥҥы температураларынан көрөн төһө ирбитин быһаараллар. Онон манна бу сайыҥҥы өҥүрүк куйаас сабыдыала суох. Ол эрэн, айылҕа араас алдьатыылаах күүстэрэ охсуулаах буолаллар.
Александр Фёдоров, учуонай: «Улахан оруолу оонньууллар. Ойуур баһаара муустаах сиргэ буолар, онтон сир аннынааҕы мууһа суох сиргэ, оччоҕо дьайыыта араас-араас буолар».
Онон оттон куйаас сайын араас өрүттээх буолуон сөп. Кураан буоллаҕына ойуур баһаардарын элбэтиэн сөп, оттон ардахтаах куйаас күн-дьыл аны улахан ууну аҕалыахтарын сөп. Оттон норуот дьылдьыта Тускул быйыл наһаа куйааһа суох өҥ сайын кэлэр диэн билгэлээтэ.
Тарас Тарасов - Тускул, норуот билгэһитэ: «Куйааһа суох +28,+29 кыраадыска тиийиэҕэ. Ол гынан баран быйылгы сайыммыт уратыта диэн – тыаллаах уонна этиҥнээх ардах элбэх буолуо».
Оттон синоптиктар бэс ыйыгар уонна атырдьах ыйыгар нуорматтан биллэ итии буолар диэбиттэрэ бу сабаҕалаан көрүүлэр диэн этэллэр. Сөп түбэһии 70 бырыһыаны аһарбат, онон толору мэктиэни биэрбэт.