Дьокуускайга "Мин үлэлээх сайыным" обургу оҕолорго анаммыт үлэ дьаарбаҥката буолла
Оҕо Дыбарыаһын тиэргэнэ. Киирэр сиртэн ыла уһун уочарат тардыллар. Бу барыта сайыҥҥы кэмҥэ үлэлиэн баҕалаах оскуола үөрэнээччилэрэ. Оҕолор бэйэлэрэ, сорохтор төрөппүттэрин кытта кэлэ тураллар. Үлэ дьаарбаҥкатыгар сүрүн ирдэбил 14 саастарыттан үөһэ саастаахтар. Манна кэлбит оҕолор үксүлэрэ аан бастакытын үлэлиир баҕалаахтар, сорохтор номнуо уопуттаахтар.
Самаана Алексеева, оскуола үөрэнээччитэ: "Баһаатай үлэтин көрдүүбүн эбэтэр тутар этэрээттэргэ баран билсиэм".
Элизабет Михайлова, оскуола үөрэнээччитэ: "9 кылааска үөрэнэбин. Бастакыбын үлэ көрдүүбүн. Сынньлаҥ пааркатыгар атыыһыттыам этэ".
Дьаарбаҥкаҕа 15 үлэ тэрилтэтэ уопсайа 200 үлэ миэстэтин туруорда. Вакансиялар тустарынан этэр эбит буоллахха, сүрүннээн манна атыы-эргиэн, өҥө оҥороооччулар хайысхаларыттан үлэ миэстэлэрэ бааллар. Холобур, иитээччи, баһаатай көмөлөөһөөччүтэ, аниматордар, атыыһыттар, устудьуоннар тутар этэрээттэригэр хомуйуу, тупсарыы үлэтигэр кыттааччылар наадалар. Үлэлиэн баҕалаах олус элбэх, онтон үлэ миэстэтэ кырыымчык, кэлбит бары үлэ миэстэтигэр тиксибэтэ.
Яна Протопопова, төрөппүт: "Оҥостон аҕай кэлбиппит, онтукабыт 14 саастаах оҕолорго биир эрэ сиргэ үлэ миэстэтэ баар эбит. Онон булбатыбыт диэххэ сөп. Барыта 15-16 саастарыттан".
Маныаха бу сайын устата куорат үрдүнэн уопсайа 2 тыһыынча кэриҥэ оскуола үөрэнээччитин сайыҥҥы кэмҥэ дьарыктыыр сорук турар. Бу дьаарбаҥкаҕа кыайан үлэ миэстэтигэр хабыллыбакка хаалбыттар, анкета толордулар.Салгыы «Моя работа" дьарыктаах буолуу киинигэр кэлэн үлэ миэстэтин туһунан билсиэхтэрин сөп.
Мария Слепцова, Дьокуускайдааҕы нэһилиэнньэ дьарыктаах буолуутун киинин салайааччы: "Оҕолор анкета толордулар, манан көрөн үлэ биэрээччилэр таһаарбыт вакансияларынан эрийэн саҕалыахпыт".
Үлэ миэстэтинэн хабыллыбыт үөрэнээччилэр хамнастарын таһынан, эбии материальай өйөбүлүнэн хабыллыахтара. Ол курдук быйыл 342 оҕо 7 тыһыычнтаттан тахса сууммалаах эбии төлөбүр ылар кыахтаныҕа. Маны тэҥэ, оҕолорго анаан дьарыктаах буолуу киинин психологтара идэ талыытыгар туһааннаах консультациялары ыыталлар. Маннык оҕолорго анаммыт үлэ дьаарбаҥкалара өрөспүүбүлүкэ үгүс улуустарыгар тэриллиэхтэрэ.