Сүрэх-тымыр киинэ ыарахан ыарыылары кыайыыга дьоһун түмүктэри көрдөрөр
Олох иһин охсуһуу. Инсультаан суһал көмөннөн кэлбит аҕам саастаах дьахтарга бастакы көмө оҥоһуллар. Оборуудабанньа барыта үрдүкү кылаастаах, илии анныгар. Маннык ыксаллаах кэмҥэ хас биирдии сөкүүндэ күндү. Уопуттаах исписэлиистэр түргэн үлүгэрдик бастакы бэрэбиэркэни оҥоро охсоотторун кэннэ эпэрээссийэҕэ салгыы барар. Манна барытыгар 15 эрэ мүнүүтэ бэриллэр.
Альбина Фёдорова, Өрүспүүбүлүкэтээҕи сүрэх уонна тымыр ыарыыларын эмтиир киин балыыһаҕа тутар, диагноз туруорар салаатын сэбиэдиссэйэ: «МРТ, КТ доступнай, УЗИ аппараата бэйэбитигэр баар. Анаалыстарбытын аҕыйах мүнүүтэ иһигэр оҥорон биэрэллэр».
Өрөспүүбүлүкэтээҕи сүрэх, тымыр киинэ аһыллан үлэлээбитэ 3 сыл буолла. Бу кылгас кэм иһигэр аныгы ирдэбилинэн тутуллубут, толору хааччыллыбыт Кииҥҥэ 16.5 тыһыынча киһи туһааннаах көмөнү ылла. Кииҥҥэ саҥа салаа быһыытынан төбө тымырыгар кэһиллиилээх дьону эмтээһин ыытыллар. 3 сыл устата 400 тахса төбөҕө уустук эпэрээссийэ оҥоһулунна.
Владимир Осипов, Өрүспүүбүлүкэтээҕи сүрэх уонна тымыр ыарыыларын эмтиир киин рентген-хирург бырааһа: «Сосудистай киин арыллыаҕыттан ишемическай инсуллары суһаллык эмтиибит».
Күннэтэ араас хабааннаах эппэрээссийэлэр тиһигин быспакка оҥоһуллаллар. Кардиохирургия салаата сүрүннээн сүрэххэ аһаҕас эппэрээссийлэри оҥоруунан дьарыктанар. Маныаха төрүөҕүттэн сүрэҕэр порогтаах оҕотуттан саҕалаан, улахан киһиэхэ, кырдьаҕастарга араас сүрэх тымырын ыарыыларын, тэбэр тэтимин кэһиллиитин эпэрээссийэлэр оҥоһуллар.
Күндүл Иванов, Өрүспүүбүлүкэтээҕи сүрэх уонна тымыр ыарыыларын эмтиир киин дириэктэрэ: «3 сыл иһигэр 6,5 тыһ. улахан эппэрээссийэлэри оҥордубут сүрэххэ уонна тымырга. Ол иһигэр аһаҕас эппэрээссийэ сүрэххэ 1000 курдук, 3,5 тыһ. сүрэх тымырдарыгар оҥордубут».
Саҥа оборуудабанньа, аныгы технология киирэн үлэ биллэ тэтимирэн ыарыһах көрдөрүнэригэр бары усулуобуйа баар. Киин үлэҕэ киириэҕиттэн кардиохирурдар саҥа технологиялары, ньымалары баһылаан уһулуччу уустук эпэрээссийэлэри ситиһилээхтик ыытыыларын түмүгэр өлүү аҕыйыыр.