"Сайсары" ырыынагар үрүҥ ас дэлэйэр

Үүт ас билигин кэм дэлэйэр эрэр. Хаһаайыстыбалартан үрүҥ ас кэлиитэ тэтимирдэ. Сүөгэй, арыы, чөчөгөй киин улуустартан киирэр, билигин суол аһыллан  Илин Эҥэртэн эмиэ көхтөөхтүк кэлэр. Сүрүннээн Таатта, Уус Алдан, Нам, Хаҥалас улуустарын бородууксуйата элбэх буолар. Римма Корякина ырыынакка үлэлээбитэ быданнаата. Урукку сыллары кытта тэҥнээтэххэ, быйыл үүт ас дэлэйэринэн буолбатаҕын этэр. 

Римма Корякина, атыыһыт: «быйыл үүт ас татым. Уруккуга тэҥнээтэххэ сэмэй. Холобур, Мэҥэ Хаҥаластан, Намтан, хаҥаластан кэллэ бүгүн үрүҥ ас».

Сыана туһунан этэр буоллахха, сыана улаханнык үрдүү илик. Быырпах балтараа лиитэрэтэ 200, сибиэһэй сүөгэй 300-400 грамма 4-5 мөһөөх, суорат 150 турар, иэдьэгэй 500 грамма - 250 мөһөөх, үүт лиитэрэтэ 160 турар. Ынах арыытын киилэтэ - биир тыһыынча 700 солк. тиийбит. Кыра граммнарга быһыллыбыт куһуоктары амсайыыга диэн ылыахха сөп. 

Елизавета Макарова, атыыһыт: «Дьон ордук сибиэһэй сүөгэйи, күөччэх чөчөгөйүн, барыанньа ылар».  

Сибиэһэй үрүҥ аһы атыылаһар дьон биирдиилээн кэлэр. Дьокуускай олохтооҕо Христина Николаевна Неустроева ырыынакка сибэкки рассадатын атыылаһа кэлбит, үрүҥ аһы соотору-сотору кыралаан амсайыыга ылабын диэн этэр.

Христина Неустроева, Дьокуускай олохтооҕо: «Сүөгэй, буотарах курдук төрүт астары ырыынактан ылабын. Олохтоох ас сибиэһэй буолар».

Билигин хортуоппуй олордуутун үгэнэ. Онон ырыынактан сиэмэ хортуоппуйу атыылаһыахха сөп. Хортуоппуй сыаната иһититтэн көрөн араас сыанаҕа турар. Холобур, кимиэхэ хайдах табыгастааҕынан хортуоппуй сиэккэ куулга, хоппоҕо, дьааһыкка хааламмыт. Киилэтин 100 диэн быспыттар. Уоннаах биэдэрэ тыһыынча икки мөһөөх. Хортуоппуй сүрүннээн Хаҥалас улууһун нэһилиэктэриттэн киирэр.

Мантан сайын бэйэ үүтэ, олохтоох оҕурот аһа, күөх үүнээйитэ элбиэ, ону тэнэ сир аһа ситтэҕинэ кылгас сайыммыт минньигэс бэлэҕин амсайыахпыт турдаҕа.