Саха сиригэр клещкэ ытыттарыы 40 тахса түгэнэ бэлиэтэннэ

Сынньалаҥ пааркатыгар ураты сарсыарда. Киирии аан хатыылаах. Кими да аһарбаттар. Иһирдьэ икки исписэлиис парка ойуурун үөнтэн-көйүүртэн эмтиир. Саамай сүрүнэ - бу суурадаһын дьону клещ курдук кутталлаах үөнтэн харыстыаҕа. Итиэннэ маннык эмтээһин кэннэ бырдах эмиэ сүтэр.

"Сынньалаҥ пааркатыгар уопсайа 40 тыһ. кыбадыраатынай миэтэрэ иэннээх сири ыстарыахтара. Үөнтэн-көйүүртэн харыстыыр эмп тута туһалаабытынан барар. Итиэннэ улахан ардаҕа суох сайыҥҥа 2-3 ый туһалыахтаах",- Мария Дмитриева, корреспондент.

Исписэлиистэр хас биирдии мас төрдүн, от быыһын кичэйэн ыстараллар. Суурадаһын бастаан утаа олус куһаҕан сыттааҕын, киһи доруобуйатыгар буортулааҕын иһин бастакы күннэргэ оту-маһы тыыппат наадатын ыйаллар. Бу сүлүһүннээх үөнү эмтииргэ саамай билигин тоҕоостоох кэм.

Роман Козлов, дезинфекционист: "Билигин араас үөн-көйүүр, ол иһигэр клещ, саамай тарҕанар кэмигэр эмтиибит".

Бу харамай энцефалит диэн киһини өлүөр диэри сүһүрдэр кутталлаах вируһу тарҕатааччы. Онон дьон ордук тоҕуоруһар сирдэрин, оҕо лааҕырдарын эмтээһиҥҥэ сыллата улахан болҕомто ууруллар.  Халлаан сылыйыаҕыттан Саха сиригэр клещкэ ытыттарыы 40 тахса түгэнэ бэлиэтэннэ.

Валентина Григорьева, Роспотребнадзор Саха сиринээҕи салалтатын эпидемиологическай санитарнай кэтээн көрүү салаатын салайааччытын солбуйааччы: "Бүгүҥҥү туругунан өрөспүүбүлүкэҕэ Алдаҥҥа, Нерюнгрига, Ленскэйгэ, Өлүөхүмэҕэ, Аммаҕа уонна Дьокуускай куоракка 44 киһи клещкэ ытыттарбыта биллэр. Мантан аҥаара атын региоҥҥа ытыттарбыттар".

Ыам уонна бэс ыйдарга клещкэ ытыттарыы саамай элбэхтик бэлиэтэнэр. Бу үөн окко саһа сытан киһи этигэр хатанар. Онон биир да сантымыатыры көтүппэккэ ыстарарга күһэллэллэр. Уопуттаах исписэлиистэр күн аҥаарыттан ордук кэм устата парканы эмтииллэр.

Николай Горохов, Дьокуускайдааҕы сынньалаҥ пааркатын күөх хаһаайыстыба маастара: "Үксүн дьон саамай сылдьар сирин эмтии сатыыбыт. Итини таһынан диэки диэккини уонна суол кытыытын ыстарыахпыт " . 

 Онон сынньалаҥ парката дуоһуйа сынньанарга бары өттүнэн табыгастаах усулуобуйа тэриллэр. Оттон бу киһи этигэр хатанар үөнтэн харыстаныыга  өссө биир саамай туһалаах көрүҥ - быһыы. Олорор сиргинэн балыыһаҕа ким баҕар ылыан сөп.