ГТРК "Саха" хампаанньа үгэскэ кубулуйбут "Мин төрөөбүт дьиэм" күрэҕэ салҕанар

Хаартыскалар кэпсииллэр. Васильев Мелетий Аввакумович Аҕа дойду сэриитин 1 степэннээх уонна Кыһыл сулус уордьаннаах гвардия старшай лейтенана. Саха хорсун байыаһын туһунан Сунтаардааҕы оҕо библиотеката өйдөнүмтүө буоллун диэн ойуутук халыыптаан кэпсиир.  Маны барытын Мелентий Аввакумович кыыһа  Любовь Мелетьевна ситэрэн -хоторон биэрэр.

Любовь Прокопьева, Мелетий Васильев кыыһа: «Сталинградскай кыргыһыыга кыттыбыта. Мамаев Кургаҥҥа хойуут ийэм, аҕам буолан бара сылдьыбыппыт».

"Мин төрөөбүт дьиэм" күрэх быйыл ис хоһооно Улуу Кыайыы 80 сылыгар ананар. Ордук оскуола үөрэнээччилэрэ бу күрэххэ көхтөөхтүк кыттар итиэннэ бүтүн дойду үрдүнэн ытыктыыр дьоммут туһунан билиһиннэрэллэр.

Руслана Максимова, "Вести-Саха" информационнай биэрии шеф-эрэдээктэрэ: «Аҕа дойду Улуу сэриитин кэмэ дойду хас биирдии олохтооҕун, хас биирдии дьиэ кэргэнин аймаабытын билиэбит. Бу кэми биһиги, билиҥҥи көлүөнэ – ыччат, дьон-сэргэ хайаан даҕаны үйэтитиэхтээхпит диэн сыаллаах бу куонкуруһу биһи хампаанньа тэрийдэ. Онон өрөспүүбүлүкэ хас биирдии олохтооҕо төрөөбүт нэһилиэгин, улууһун, чугас аймахтарын, дьонун-сэргэтин олоҕун сырдатарыгар олус үчүгэй түгэн».

Күрэс балаһыанньатыгар ыйылларынан үлэ суругунан эмиэ буолуон сөп. Үгүс киһи эйэлээх олоҕу, бэтэрээн эһээлэрбит туһунан, ол кэминээҕи өстөөҕү утары кыргыһыыны хоһооҥҥо тиһэн ыыталлар, ахтыы быһыытынан суруйаллар. Маны сэргэ хаартыскаларынан наардаан кыайыыны уһансыбыт дьоммутун үйэтитии эмиэ биһирэнэр. Холобур, Хаҥалас улууһун Бэстээх нэһилиэгиттэн "Өлбөт тыыннаах полк" оҥорон ыыппытар. Манна нэһилиэктэн Аҕа дойду сэриитин кыттыылаахтара уонна тыыл бэтэрээннэрэ киирбиттэр.

"Мин төрөөбүт дьиэм" күрэх быйыл иккис сылын ыытыллар. Былырыын Саха сирэ бүттүүнэ олус көхтөөхтүк кыттыбыта. Уопсайа 100-чэкэ үлэ киирбититтэн Эдьигээн улууһуттан Дмитрий Апполлонов кыайыылаҕынан биллэриллибитэ. Итиэннэ кини дойдутун туһунан биһиги ханаалбыт документальнай киинэ устан турар. Быйылгы кыайыылаахха эмиэ биһиги устар бөлөхпүт тиийиэ.

Күрэх сүрүн балаһыанньатын туһунан gtrksakha.ru сайтан билсиэххэ сөп, үлэлэргитин эмиэ бу сайпытыгар ыытыҥ. Түмүк бэс ыйын 5 кэннэ тахсан кыайыылаахтар быһаарыллыахтара.