Дьокуускай - Аллараа Бэстээх хайысханан паром сырыыта саҕаланна

Аан бастакынан линияҕа Паромы Якутии тэрилтэ 4 уонна АЯМ хампаанньа 1 суудуната таҕыста. Бу 9-с нүөмэрдээх бастакы паромунан тиксиини оҥорор тиэхиникэ уонна туһааннаах үлэһиттэр айаннаатылар. Бастаан киин куорат өттүн бэлэмнээтилэр онтон уҥуор кытылы оҥоруохтара.

Николай Андреев, үлэһит: «Переправаҕа шлагбаум монтажтыы баран иһэбит. Бу өттүгэр бүтэрдибит, билигин уҥуор видеонаблюдение уонна динамиктары туруорабыт».

Бастакы паром айанныыра үлэһиттэргэ ордук эппиэтинэстээх кэм. Оттон хапытааҥҥа икки бүк. Дмитрий Митин номнуо 34-с навигациятын арыйда. Кыһын устата суудуналарын өрөмүөннээн-саҥардан барыларыттан эрдэ бүтэн бастакынан линияҕа тахсар чиэскэ тиксибиттэр.

Дмитрий Митин, 9-с №-дээх паром хапытаана: «В этом году у нас основная работа – частично заменили палубу с набором. Спасибо руководству, что идет навстречу нам и ремонтируют суда. Новые запчасти поставили на главные двигатели. Обеспечение хорошее, мне за свой пароход не стыдно.».

Кырдьык да саҥардыллыбыт паром харахха тутатына быраҕыллар. Саҥа кырааскалаах, ыраас. Оттон өр-өтөр буолбакка, балтараа чааһынан бастакы уу аала Аллараа Бэстээх кытылын булла.

Илин эҥэртэн паромҥа киириигэ халыҥ уочарат. Суоппардар киирэр суол оҥоһулларын кэтэһэн тураллар. Маны тэҥэ үлэһиттэр тутатына шлагбауму, видеокамераны итиэннэ түүннэри-күнүстэри маныыр будканы туруораллар. Паромҥа киирии суол оҥоһуллаатын кытта массыыналар бии-биир суудунаны толороллор. Навигация арыллыытын саамай кэтэспиттэр биллэн турар бу эҥэр олохтоохторо.

Пётр Обоюкин: «Биһи илин эҥэрдэр саамай кэтэһэр буоллахпыт. Кыһалҕалаах дьоҥҥо саамай наадалаах буоллаҕа».

Онон толору массыыналаах 9-с паром бастакы рейсин этэҥҥэ түмүктүүр. Быйыл сүрүн уларыйыы айан төлөбүрүгэр буолла. Ол курдук, массыына ыйааһынынан буолбакка устатын кээмэйинэн көрөн тарыып олохтонно. Быһа холоон икки мөһөөх солкуобайынан сыана үрдээтэ. Маны тэҥэ төлөбүрү накопительга киириигэ төлүүр буоллулар.