Анал байыаннай дьайыыга сылдьар биир дойдулаахтарбытыгар көмөнү оҥоруу тохтообот

Волонтердар ыстааптарыгар үлэ күөстүү оргуйар. Билигин иистэнньэннэр байыастарга анаан сайыҥҥы таҥас тигэ сылдьаллар. Көстүүм икки суол өҥнөөх, бороҥ уонна күөх.  Күҥҥэ биир иистэнньэн иккилии көстүүмү тигэр.

Анна Ефимова, “Якутия с тобой” хамсааһын бэрэссэдээтэлэ: «Уу хоппот, ардахтан харыстыыр. Бу тактическай панама. Манна уолаттар оту-маһы, сэбирдэхтэри уган оҥостоллор».

Ыстаапка 40-тэн тахса иистэнньэн баар, ону таһынан ийэлэр, эбээлэр үлэлэрин кэннэ, киэһэ кэлэн көмө буолаллар. Таҥас-сап тигэллэр, байыастарбыт дурдалаах-хаххалаах буоллуннар диэн анал сиэккэ өрөллөр.

Оттон ыстаап биир тумус туттар волонтера, элбэх оҕо аҕата, эйэҕэс эһээтэ Владимир Саморцев. Кини бу ыстаап тэриллиэҕиттэн, бэйэтин баҕатынан үлэтин кэннэ, кэлэн күүс-көмө буолар.

Владимир Саморцев, волонтёр: «Панама матырыйаалын кырыйа турабын. Сүрүн үлэлээхпин, өрөбүллэрбэр кэлэн көмөлөһөбүн. Мин ыараханы көтөҕүү буоллун, массыынанан таһыы буоллун, барытыгар сылдьабын».

Якутия с тобой уопсастыбаннай ыстаап бу сыл саҕаланыаҕыттан барыта сэттэ туонна гуманитарнай көмөнү ыытта. Күн бүгүн 200-тэн тахса киилэ гуманитарнай көмө, бараары бэлэм. Маны таһынан волонтердар Курск куорат олохтоохторугар эмиэ көмө хомуйар.

Анна Ефимова, “Якутия с тобой” хамсааһын бэрэссэдээтэлэ: «Юбилейный маршрут добра диэн аахсыйа саҕаланна. Онно олохтоохтору кыттарга ыҥырабыт. Хомуллубут гуманитарнай көмөнү Курскай уобаласка ыытабыт».

Хас биирдии Саха сирин олохтооҕо, улуус, тэрилтэлэр, байыастарга көмөнү тохтообокко ыытар. Бу курдук бары түмсэн анал байыаннай дьайыы кыттыылаахтарыгар бэйэлэрин көмөлөрүн ууран, сэмэй кылааттарын киллэрэллэр.