Ньукуолун күнэ. Хаһаайыстыбалар сайылыкка көһөн саҕалаатылар

Бостууктар акка, тимир көлөҕө олорсон хороҕор муостаахтары үүрэллэр. Биир да төбө туора барбакка этэҥҥэ сайылыкка тиийэрин көрөллөр. Ферматтан тахсыы судургу, ол эрэн иннигэр биир улахан харгыс - трассаны туорааһын.

Ол эрэн, бу сырыыга бары сүөһү аннараа эҥэр этэҥҥэ туораата. Суоппардар да өйдөөн хороҕор муостаахтар трассаны ааһалларын кэтэһэн турдулар.

Оттон сүөһү бииһэ хааман кэлэр кэмигэр Хараанай сайылыкка үлэһиттэр көһөн малларын-салларын сүөкүү сылдьаллар. Ыанньыксыт Людмила Николаевна Сивцева бу Хараанайга 10-с сайына. Үгэс быһыытынан  аан бастакынан дьиэтин-уотун иччитин аһатар этэҥҥэ күөххэ үктэммиттэринэн махтанар. Кыһын устата иччитэхсийэн турбут дьиэлэрин кэлэн өрө көтөҕөллөр. Манна 5 дьиэнэн үлэһиттэр олороллор.

Людмила Сивцева, ыанньыксыт: «Наһаа үчүгэй сайылык. Уот күөс диэн суох этэ, оннук икки сыл олорбуппут. Сибэкки олордобут, сайынын манна барыта сибэкки буолар».

Бу Туймаада экоферма Нөмүгүтээҕи салаата үс сайылыктаах. Биир бастакынан бу Хараанай сайылыгар көһөллөр. Быйыл судургута суох кыстык ааспыт. Кураан дьыл буолан сүөһү эбии аһылыга үчүгэйдик үүммэтэх, онон сүөһү отунан уонна комбикорманан кыстаабыт. Ол эрэн төрүөхтэрэ быйыл үчүгэй.

Михаил Игнатьев, "Туймаада" экоферма Нөмүгүтээҕи салаатын бэтэринээрэ: «223 ынах кыстык устата төрөөтө. 80-ча ынах сайын төрүөхтээх. Биһиэхэ сыл эргиччи төрүүллэр ».

Онон тустаах хаһаайыстыба 700 тахса төбө хороҕор муостаах күөххэ этэххэ үктэннэ. Үрүҥ илгэ үрүлүйэр кэмигэр эппиэтинэстэрэ улахан, былааннара киэҥ. Ол курдук сылга 800 тахса туонна үүтү ылар сыал-сорук турар.

Евдокия Устинова, сүрүн зоотехник: «Биэс ый түмүгүнэн сыллааҕы былааммытын 92% толорон кэллибит. Билигин күөххэ үүктэнэн өлгөмнүк ыан былааммытын эккирэтиһэн ситиэхпит диэн эрэллээхпит».

Оттон өр-өтөр буолбакка ойуур быыһыттан сүөһү маҕырыыра иһиллэр. Ынахтар сайылыктарын этэҥҥэ булаллар.

Билигин бүтүн өрөспүүбүлүкэ үрдүнэн хаһаайыстыбалаахтар күргүөмүнэн сайылыкка көһөн эрэллэр. Быйыл уопсайа 309 сайылыкка барыта 35 тыһ. тахса төбө көһүөҕэ.