Саха сиригэр ыһыы хампаанньата саҕаланна

Буоларын курдук аграрийдарга көмөҕө устудьуоннар таҕыстылар. Тыа хаһаайыстыбатын техникумун иккис кууруһун үөрэнээччитэ Алина Бурцева үөрэх практикатын бааһынаҕа ааһар. Агроном идэтигэр үөрэнэр буолан бу киниэхэ бастатан туран үлэҕэ уопут буолар.

Алина Бурцева, Тыа хаһаайыстыбатын техникумун 2 кууруһун устудьуона: «3 буолан кэллибит. Капельнай уу кутар ситимин туруора сылдьабыт. Бастакы күммүт, бэс ыйыгар дылы үлэлиибит. Сөпкө талбыппын дии саныыбын, салгыы бу хайысханнан үлэлиэм».

Ний крестьянскай хаһаайыстыба номнуо 10 тахса сыл оҕуруот аһын үүннэриинэн дьарыктанар. Ордук элбэх иэҥҥэ хортуосканы, моркуобу, сүбүөкүлэни, хаппыыстаны олордоллор. Бааһыналара 42 га иэннээх. Быйыл дьыл эрдэлээн, ыһыыга эмиэ арыый урутаан киирбиттэр. Хортуосканы, сүбүөкүлэни, моркуобу номнуо ыспыттар. Хаппыыстаны бу күннэргэ олордорго бэлэмнииллэр.

Оттон Ким хаһаайыстыба хортуосканы олордорго бэлэмнэнэр. Билигин кыһын устата хараллан сыппыт хортуоска сиэмэлэрин ыһыы иннинэ көрө-истэ сылдьаллар. Маны тэҥэ быйыл саҥа суорду олордон көрүөхтэрэ.

Валерий Ким, бааһынай хаһаайыстыба салайааччыта, СӨ тыа хаһаайыстыбатын үтүөлээх үлэһитэ: «Будут грузить картофель семенной в Иркутске 25 тонн. Они придут как раз к открытию переправы. Чтобы обновить свой ассортимент, это нужно делать, чтобы урожай был больше».

Дьокуускай эҥэр күн бүгүн 36 хаһаайыстыба ыһыыга үлэлиир. Мантан улахан аҥаара хортуоска олордуутунан дьарыктанар. 12 хаһаайыстыба сүөһү эбии аһылыгын үүннэриигэ ылсан үлэлиир. Билигин бааһыналарга барытыгар үлэ саҕаланна.

Марианна Пермякова, Дьокуускайдааҕы тыа хаһаайыстыба салалтатын сүрүн агронома: «Билигин хаһаайыстыбалар күргүөмүнэн тахсан эрэллэр. Сиик саптарыыта 540 га ыытылынна. Ыһыы үлэтигэр 127 киһи, 43 тыраахтыр, 10 сеялка, 20 сажалка уонна сири таҥастыыр тиэхиникэ 54 тахсыаҕа».

Оттон өрөспүүбүлүкэ үрдүнэн уопсайа 58 тыһ. тахса га иэҥҥэ ыһыы үлэтэ ыытыллыаҕа. Буоларын курдук ордук элбэх иэннээх Амма улууһа, манна 10 тыһ. тахса га ыһыы үлэтэ барыа итиэннэ Хаҥаласка 7 тыһ. кэриҥэ га. Ааспыт сыллааҕар быйыл үүнүү кээмэйин үрдэтэ сыал-сорук турар.