Саха сиригэр туризмы сайыннарыы

Күнүс 12 чаас. Кинилэргэ эмиэ эбиэт кэмэ. Чочур Мураан көтөрдөрө кыстыктарын этэҥҥэ ааһан дьон-сэргэ көрүүтүгэр таҕыстылар. Хаһаайыттар эмиэ дьиэ кыылын курдук кыһаллан көрөллөр-истэллэр.

Алмаз Николаев, туристическай эбийиэк үлэһитэ: «Дьоннору кытта алтаһаллар, куоппаттар. Прическалаах кустары “красавчиктар” диэн ааттыыбыт».

Манна кустары таһынан холууптар, хаастар уонна соҕотох куба баар. Кини аналын була илик, онон чункуйбуттуу соҕотох күөлгэ устар.

Саха сиригэр сайыҥҥы туристическай сезон саҕаланна. Биһиги Өрөспүүбүлүкэбитигэр бу хайысха биллэ сайдан регион иһигэр сынньаныы саҥа таһымна тахсар. Атын регионнартан уонна тас дойдуттан сылын аайы кэлээччи ахсаана улаата турар. 

Ирина Десенко, туристическай эбийиэк үлэһитэ: «2023-24 сыллаахха 45 тыһ. киһи ыалдьыттаан ааста. Быйыл элбииллэрэ буоллар үөрүө этибит. Ааммыт өрүүтүн аһаҕас».

2023 сыллаахтан дойду үрдүнэн "Туризм уонна ыалдьытымсах буолуу" национальнай бырайыак үлэлиир. Бу бырайыак чэрчитинэн ааспыт сылга Саха сиригэр федеральнай бүдьүөттэн 25 мөлүйүөн сууммалаах көмө оҥоһуллубута. Онтон быйыл 30 мөлүйүөннэ тэҥнэстэ.

Валентина Яковлева, СӨ урбаан, эргиэн уонна туризм сайдыытын министиэристибэтин пресс-сулууспата: «Бу субсидия модульнай дьиэлэри тутааһыҥҥа диэн буолбута. Кэлэр ыйга субсидия куонкуруһун кэтэһэ сылдьабыт, онно 1 мөл. дылы бэриллэр».

Амма улууһа туризм эйгэтин биир бастыҥа. Улууска 50-тан тахса туристическай эбийиэк үлэлиир.  Былырыыҥҥы көрдөрүүнэн Аммаҕа 65 тыһыынчаттан тахса ыалдьыт кэлэн барбыт.

Василий Бураев, Амма улууһун баһылгын эбээһинэһин толорооччу: «Өрөспүүбүлүкэттэн эрэ буолбакка атын дойдуттан кытары кэлэн сынньанар буоллулар. Булт, балыктааһын, арааһынай туристическэй көрүҥ өҥөтө барыта баар».

Быйылгы сылга барыллаан этиинэн ыалдьыт ахсаана ханнык да сыллааҕар элбиир чинчилээх. Маныаха чуолаан Саха сиригэр федеральнай таһымнаах улахан тэрээһиннэр ыытыллаллара салааа сайдыытын тупсараллар.