АГАТУ теплицэтигэр быйыл 70-чэкэ тыһыынча рассада олортулар

Агробизнес хайысхатынан үөрэнэ сылдьар Арктикатааҕы агротехнологическай университет иккис кууруһун устудьуона Анастасия Бурцева практикатын бара сылдьар. Икки ый устата ыытыллар практикаҕа устудьуоннар рассада олордуутугар, көрүүтүгэр-истиитигэр күүс-көмө буолаллар. Настя оҕурсуну сиэмэнэн олордор түбүгэр сылдьар.

Анастасия Бурцева, 2 куурус устудьуона: «Бастаан тарбахпынан бэлиэтиибин онтон сиэмбин уурабын, бүөлүүбүн уонна уу кутабын».

Күннэтэ үүнээйилэри университет преподавателлэрэ, наука кандидаттара салайааччылаах  бөлөх көрөр-истэр, бүөбэйдиир. Быйыл  70 тыһыынчака тахса рассаданы олортулар. Онтон улахан аҥара сибэкки, онтон хаалбыта оҕуруот аһын рассадата буолар. Сибэкки уонунан араас көрүҥүн, оҕуруот аһын эмиэ 10 керүҥүн сыллата көхтөөхтүк ыһаллар. Маны тэҥэ яблоняны эмиэ үүннэрэллэр.

Айысхаана Васильева, агрономия уонна химия кафедратын преподавателэ: «Бу студеннарбыт чинчийэр үлэлэрэ буолар. Яблоняларбыт эмиэ атыыламмыттара. Кыһын устата бэйэлэрэ олордоннор, сиэмэни хайдах обработкалыыртан саҕалаан үөрэнэллэр уонна рассаданан атыылыыллар».

Оҕуруот аһын рассадалара номнуо ситэн улаатан тураллар, оҕурсу, помидор, биэрэс, баклажан, тыква, хаппыыста, сүбүөкүлэ. Сибэккилэр эмиэ хайыы-үйэ ситэн дьэрэкээн өҥнөрүнэн туланы киэргэтэллэр. Манна петуния хас да көрүҥэ, бархатцы, титония, лилия, дельфиниум, лабелия, алиссум онтон да атын кэрэ сибэккилэр үүнэн чэлгийиэхтэрэ. Теплицэҕэ биирдиилэн дьон, итиэннэ дьиэ кэргэнинэн кэлэн атыылаһаллар.

Туйаара Парфёнова, Дьокуускай олохтооҕо: «Петунья, помидор, кабачок ыллым. Оҕурсум игин баар. Помидор ылар табыгастаах, дьиэҕэ миэстэ игин суох, ол иһин мантан ылар ордук».

Теплицэҕэ олунньу ыйтан саҕалаан  рассадалары олордон саҕалаабыттар.  Хас биирдии үүнээйигэ болҕомтолоох сыһыан, кыһамньы ирдэнэр. Оҕуруот аһыгар, сибэккигэ тус-туһунан уу кутуута, уоҕурдууну туһаныы туттуллар. Теплицэ күөх үүнээйитэ барыта атыыга буолбатах, чуолаан кэрэчээн сибэккилэр куораты көҕөрдүүгэ эмиэ туттуллуохтара.