Өймөкөөн улууһун Уус-Ньара бөһүөлэгэр инфраструктурнай бырайыактар олоххо киирэллэр

Хоту аҕыйах нэһилиэнньэлээх бөһүөлэктэргэ суол-ииһи тутуу-сүрүн болҕомтону ылар. Быйыл Уус-Ньараҕа киин Ленин уулуссатын капитальнай өрөмүөнүн ыытыахтара. Бу 1,2 км тахса тахса усталаах суол бүтүүннүү аспаалланыаҕа, сатыы дьон сылдьарыгар тротуар оҥоруохтара, уот-күөс туруоруохтара. Өрөмүөн үлэтэ быйыл уонна кэлэр сылга ыытыллыаҕа. Маны тэҥэ Ил Дархан Айсен Николаев хаарбах, аварийнай дьиэттэн көһөрүү бырагырааматынан тутуллар 55 кыбартыыралаах дьиэни көрдө. Тутуу бэлэмэ 70% тэҥ. Аны күһүҥҥэ диэри үлэ үмүрүйэн, олохтоохтор саҥа дьиэлэригэр киириэхтээхтэр.

Николай Прокопьев, Уус-Ньара бөһүөлэгин баһылыгын солбуйааччы: «55 кыбартыыралаах, 3 этээстээх дьиэ тутулла турар. Тутааччы – ООО “Стройкон” үлэлии сылдьар. Былырыын саҕалаатылар уонна бу атырдьах ыйыгар туттарыахтаахтар».

Хаарбах, аварийнай дьиэттэн көһөрүү 2019-2025 сыллаах бырагырааматыгар Өймөкөөн улууһун үрдүнэн 41 элбэх квартиралаах дьиэ киирбитэ. Уопсайа 600-тэн тахса киһи олорор усулуобуйатын тупсарыахтаах. Ил Дархан Айсен Николаев биир бастакынан көмүс хостуур тэрилтэлэр салайааччыларын кытта көрсөн ааспыт сыл түмүктэрин, быйылгы үлэ былаанын дьүүллэстэ.

Анатолий Андросов, СӨ промышленность миниистирин солбуйааччы: «Өймөкөөн улууһугар 40 тахса көмүс хостуур тэрилтэ үлэлиир. Олор уопсайа 9 туонна көмүһү хостууллар. Билигин Александр Савельевич – саҥа баһылык саҥа сөбүлэҥнэри түһэрсэн улуус сайдыытыгар үлэ буола турар».

Мунньахха улуус дотацията суох буоларыгар кэккэ хайысхаларга туһаанаах быһаарыылары ылыннылар, сөбүлэҥнэргэ илии баттаатылар.

Алексей Федотов, Өймөкөөн улууһун баһылыгын солбуйааччы: «2024 сыллаахха 5 сөбүлэҥ баар буоллаҕына билигин 11 баттанна. Бу үлэҕэ өрөспүүбүлүкэ болҕомтото баара биһигини үөрдэр. Бу хампаанньалары кытта үлэҕэ бастатан туран киирбит харчы Өймөкөөн улууһун сайдыытыгар туһаланыаҕа диэн үлэ барыаҕа».

Оттон Уус-Ньараҕа олохтоох аэропорт нацбырайыак чэрчитинэн ааспыт сылга саҥардыллыбыта. Ол эрээри бырайыагар итэҕэстэр уонна ыытыллыбыт үлэ хаачыстыбата суоҕунан, хаттаан көннөрүү үлэлэрэ барыахтара. Аны сайыҥҥа диэри итэҕэстэри ситэрии түмүктэнэн аэропорт былаан быһыытынан үлэлиэхтээх. Бу аэропорт өҥөтүнэн сылга 10 тыһыынча пассажир туһанар, 100 тоннаҕа тиийэ почта уонна таһаҕас тиэрдиллэр.