Нам улууһун ууга барар кутталлаах нэһилиэктэрэ олохтоохтору, ынаҕы, сылгыны куоттараллар

Үөдэй нэһилиэгэ  ууга барар кутталлаах сирдэр ахсааннарыгар киирэр. Онон сыллата олохтоохтор үрдүк сиргэ куотарга туруналлар. Людмила Ефимова ньирэйдэрин ыраах айаны сатаан тулуйуо суохтара диэн массыынан илдьэр.

Людмила Ефимова, Үөдэй олохтооҕо: "Кыстаатылар этэҥҥэ, билигин сайылыкка барар буоллахпыт. Бу ньирэйдэри ынахтарга көрдөрөбүн, оччоҕо биирдэ бараллар. Куөрдөрбөтөххө бу ынах барбат. Төттөрү төннөн кэлэ турар". 

Түөрт ньирэйи УАЗ массыына кэннигэр батаран, ийэлэрин батыһыннаран  мыраан үрдүгэр баар сайылыкка бардылар.

"Нэһилиэнньэ улахан аҥаара халаан уутуттан куотан дэриэбинэттэн барбыт. Онон манна уу чуумпу. Оттон хаалбыт дьон бары күүһү сүөһүнү куоттарыыга уурар", - Мария Дмитриева, корреспондент.

Оттон бу "Ымыйахтаах" диэн Үөдэй биир бөдөҥ хаһаайыстыбата көһөн иһэр. Субан сүөһүнү, ньирэйдэри  номнуо таһаарбыттар.

Аграфена Яковлева, "Ымыйахтаах" хаһаайыстыба үлэһитэ: "Ууттан куотан иһэбит. Ол онно өссө чааһынайдарбыт эбиллиэхтэрэ. Нэһилиэктэн 8 килэмиэтир тэйиччи барабыт, мыраан тахсыыналаах эҥин. Сыл аайы маннык, онон үөрүйэхпит, ынахтарбыт сүүрэ турдулар".

Кырдьык да, билбит курдук ынахтар сайылыктыыр суолу туттулар эрэ бөтөрөҥүнэн түстүлэр. Уопсайа нэһилиэккэ сүөһүнү куоттарар 6 анал сир баар.

"Даабмаҕа уу киирэн саҕалаата. Инньэ гынан нэһилиэк бу өттүгэр куоттарыллар сүөһүлэри бастакынан үүрэллэр. Тоҕо диэтэр уу эбилиннэ эрэ бу суол быстар", - Мария Дмитриева, корреспондент.  

Уу кэлэр кутталлаах кэмэ саҕаланан үлэүөрэх тохтообута 4 күнэ буолла. Эксээмэннээх кылаастар, Хомустаахха тэриллибит быстах кэмҥэ олорор сиргэ көһөн, үөрэнэ сылдьаллар. Олохтоохтор астарын-үөллэрин номнуо илдьибиттэр, бүгүн бэйэлэрэ уонна ынах-сылгы маассабай көһүүтэ.

Иван Гаврильев, Үөдэй нэһилиэгин баһылыга: "Хас биирдии нэһилиэк олохтооҕуттан ханна барарын, оҕотун ханна ыытарын,сүөһүтүн, сылгытын, тиэхиньикэтин ханна таһаарарыгар тиийэ мэктиэ сурук ылан олоробут".

Улахан үлэ быһыты бөҕөргөтүүгэ барбыт. Икки төгүл 70 киһилээх субуотунньук тэриллэн буор кутуллубут. Оттон билигин манна түүннэри- күнүстэри улахан массыына, буор анньар тыраахтыр дьуһуурустубалыыр. Итини сэргэ ыксаллаах быһыы-майгы быыһааччылара, муус устуутун кэтиир исписэлиистэр  үлэлииллэр.