Муус барыытын онлайн көрүөххэ сөп

Исписэлиистэр көмүөл мууһун устуутун түүннэри-күнүстэри кэтиир камераны туруораллар. Устар тэрил бастаан Кангалаас тумуһугар туруоҕа, онтон 10 тахса килэмиэтир тэйитиэхтэрэ. Оччоҕо Дьокуускай эргини эрэ буолбакка эбэ нам улууһугар баар арыыларын эмиэ көрөр кыах баар буолуо. Өлүөнэтээҕи уу салалтата маннык онлайн кэтэбили оҥорбута номнуо уонтан тахса сыл буолла.

"Сыллата харыы тахсыан сөптөөх сирдэргэ кэтэбил-манабыл үлэтэ ыытыллар. Биир оннук учаастагынан Кангалаас тумуһун анна буолар. Манна Өлүөнэтээҕи уу салалтатын исписэлиистэрэ сыллата дьуһуурустубалыыллар. Даҕатан эттэххэ, манна саас хараардыы үлэтэ ыытыллыбыта".

Устар тэрил өрүс барыытын эрэ кэтиир соруктаах буолбатах, маны сэргэ саас ыытыллар хараардыы уонна эрбээһин төһө туһалааҕын кэтииргэ улахан көмө буолар. Ол харааран көстөр, номнуо ууламмыт сир халааны утары үлэ барбытын туоһута. Сыллата өрүс сүнньэ уларыйар, онон кэтээн көрүү ыытыллара тоҕоостоох. Онтон Өлүөнэ өрүс Кангалаас тумуһун аннынан устар ураты көстүүтүн Саха сирин олохтоохторо  быһа сибээскэ көрүөхтэрэ.   

Федот Пермяков, Өлүөнэтээҕи уу салалтатын салайааччытын солбуйааччыта: "Саха сиригэр олорор дьон сүрдээҕин интэриэһиргииллэр. Уһун кыһын кэннэ өрүстэрбит эстиилэрин элбэх киһи кэтэһэр. Онон көрөөччү элбэх".

Маны сэргэ гидрологтар Өлүөнэ өрүс эстиитин туругун үөһэттэн устуунан эмиэ кэтээн көрөллөр. Бу көмүөл кэмигэр ханан харыы үөскээбитин көрөргө көдьүүстээҕин көрдөрбүт ньыма. Маныаха сыллата квадрокоптер устар кыаҕа өссө күүһүрэр.

Христофор Егоров, Өлүөнэтээҕи уу салалтатын уу хаһаайыстыбатын салаатын сүрүн исписэлииһэ: "Квадракоптердарбытын сыл аайы саҥардабыт. Ол иһин саҥаттан саҥа сирдэри хабабыт. Билигин лаппа ыраах көтүөхпүтүн сөп буолла. Онон муус алдьанарын бастакынан көрөбүт. Самсааһын таҕыста да батарыайата төһө тиийиэринэн көтүтэбит".

Онтон халҕаһа муустар усталларын бу турар дьоҕус камера көрөөччүгэ тириэрдиэ. Маныаха анаан туһааннаах исписэлиистэр өрүс барыар диэри хоно сытан устуохтара.