Дьокуускай 39№-дээх оскуолатын иһигэр баар теплица бастакы үүнүүнү биэрэр
Ураты бырайыак. Оскуола иһигэр помидордар кытаран, оҕурсулар ситэн тураллар. Маны таһынан перец хото үүнэр. Бу 39 оскуола, АГАТУ уонна "Хоту" диэн наука-үөрэхтээһин киини холбоһуктаах бырайыага. Сүрүн сыал-сорук - оскуола бырагырааматын практикаҕа чиҥэтии. Дьоҕус теплицаны 7 “а” класс үөрэнээччилэрэ көрөллөр-истэллэр.
Дима Гуляев, Дьокуускайдааҕы 39№-дээх оскуола 7 "а" кылааһын үөрэнээччитэ: “Теплицаны олунньу ыйтан үүннэрэн саҕалаабыппыт. Уопсайа 4 суорт оҕурсу, 4 суорт перец уонна 2 суорт помидор баар. Оҕурсубут наһаа минньигэс, үчүгэй баҕайы. Уопсайа 2 киилэ курдук оҕурсуну ылбыппыт. Биһиги естественно-научнай кылаас буоламмыт бу дьарык туһаны биэрэр”.
Үүнээйилэр бу курдук хара анал иһиттэргэ олордуллан тураллар. Салгыны киллэрэр, ол эрэн тэстибэт, тутарга-хабарга табыгастаахтар. Манна уу илиинэн кутуллубат. Автоматика холбонон турар. Сөп буола буола уу тохтоло суох кутулларын иһин салгына сииктээх. Онон анал теплицаттан уратыта суох. Инникитин биолог буолуон баҕалаах оҕолору учуутал Алена Соломонова үүнээйини олордуу ымпыгар-чымпыгар уһуйар.
Алена Соломонова, Дьокуускайдааҕы 39№-дээх оскуола биология учуутала: “Уруокка ылбыт билиилэринэн манна теплицаҕа кэлэн үлэлиэхтээхтэр. Үүнээйилэрбит уоҕурдуута суох үүнэллэр. Буорун састаабыгар органика эрэ баар”.
Маны тэҥэ өлгөм үүнүү биир сүрүн кистэлэҥэ күн уотун собуйар анал лаампалар. Кэтээн көрүү түмүгүнэн помидорга уонна перецка барсар микроклимат олохтоммут. Оттон оҕурсуну өссө да таба иликтэр, үөрэтии, чинчийии өссө да иннигэр. Бу маннык бырайыак оҕолор оскуола эрдэхтэн тыа хаһаайыстыбатын салаатыгар саҥа технологияны кытта билсэллэригэр, идэҕэ интэриэстээх буолалларыгар туһуланар.
“Бу теплица буолан саҥа ньыма холонон көрөр. Ханна да туһунан буолбакка, оскуола иһигэр өлгөм үүнүүнү ылыы ситиһиллэр. Бу көтөрүн курдук үс ый иһигэр номнуо ас кута турар”, - Мария Дмитриева, корреспондент.
Оҕуруот аһын тэҥэ оҕолор сибэкки арааһын олордон тураллар. Сотору кэминэн үөрэнээччилэр бүөбэйдээн улаатыннарбыт үүнээйилэрэ оскуола таһын киэргэтиэхтэрэ. Оттон бырайыак саҥа үөрэх дьылыгар өссө кэҥээн үлэтин салҕыаҕа.