Быйыл ойуур баһаара эрдэ саҕаланна
«Өрөспүүбүлүкэҕэ ыам ыйын 1 күнүттэн ойуур баһаарыттан ураты сэрэхтээх кэм биллэриллэн турар. Маныаха ойуур баһаардара киһи дьалаҕай сыһыаныттан тахсаллар. Ол курдук айылҕаҕа сынньанааччылартан, өрт уотуттан, булчуттартан. Онон билигин буруйдаахтары быһаарыы үлэтэ барар. Хонтуруол күүһүрэр», - Ирена Осипова, корреспондент.
Ордук устук балаһыанньа билигин Дьааҥы улууһугар. Манна күн бүгүн ыксаллаах быһыы-майгы режимэ биллэриллэн турар. Баһаартан ураты сэрэхтээх буолуу кэмэ саҕаланыаҕыттан тустаах улууска номнуо 41 ойуур баһаара бэлиэтэммитэ. Билигин 36 умуруордулар. Маны тэҥэ 790 гаа иэннээх 51 хонуу баһаара тахсыбытыттан эмиэ 36 төгүрүттүлэр. Дьааҥы улууһугар баһаары умулларыыга «Авиалесоохрана» үлэһиттэрэ күүс-көмө буолаллар.
Николай Никитин, СӨ ойуур харыстабылын уонна чөлүгэр түһэрии департаменын салайааччы: «Дьааҥы улууһугар 51 хонуу баһаара тахсыбыта. Онтон 36 умуруоруллубута. Билигин 15 баһаары 260-ча гектарга умуруора сылдьаллар. Бу баһаардар 10 нэһилиэккэ 10 килэмиэтирдээх зонаҕа буола тураллар. Манна 200 тахса киһи үлэлии сылдьар уонна 10-чэ тиэхиньикэ».
Маныаха тустаах улууска бултка хааччахтааһыны киллэрээри тураллар. Билигин туһааннаах докумуон Россия айылҕа ресурсаларын министиэристибэтигэр илии баттааһыҥҥа сытар. Нэһилиэнньэ өйдүөх тустаах, билигин баһаардар барыта дьон уоту сэрэҕэ суох туттуутуттан тахсаллар.
Дмитрий Садовников, СӨ быпабыыталыстыба бэрэссэдээтэлин маҥнайгы солбуйааччы: «Билигин элбэх түбүгү уонна кыһалҕаны үөскэттэ. Умуруоруу үлэтэ ааспыт сыллардааҕар эрдэ саҕаланна. Күн бүгүн 10 ойуур баһаарын уонна 2ҥ хонуу баһаарын бэлиэтиибит. Үгүстэрэ Дьааҥыга уонна Эбээн Бытантайга бааллар».
Маны тэҥэ Мэҥэ Хаҥалас, Уус Алдан оройуоннарыгар уонна Дьокуускайга хонуу баһаардара бэлиэтэннилэр. Киин куоракка аҕыйах күннээҕитэ күөх хонууга уот тура сырытта.
Оттон буруйдаахтары буларга билигин күүскэ барар. Холобур, бу сокуоннайа суох өрт уотун ыыппыт киһини булан административнай миэрэҕэ тартылар.
Онон Ыксаллаах быһыы-майгы министиэристибэтэ нэһилиэнньэҕэ өссө биирдэ туһаайан тиэрдэр. Айылҕаҕа сынньанааччылар, булчуттар уот оттортон туттунун, оттон өртөөһүн сокуонунан бобуулааҕын өйдөөҥ.