Үгэскэ кубулуйбут сарсыардааҥҥы эрчиллиилэр өрөспүүбүлүкэ бары улуустарыгар саҕаланнылар

Сарсыарданы Кыайыыттан - бэйэни кыайыыттан саҕалаа этиинэн салайтаран үгүс киһи сарсыардааҥҥы дьарыкка муһунна. Оттон эрчиллиилэри биллэр спортсменнар, кырдьык да кыайыы кынаттаах чөмпүйүөннэр ыыттылар. Олимпийскай оонньуулар кыттыылааҕа, спорт маастара Сардаана Трофимова, Арассыйа бастыҥ кроссфит-атлета Александра Барашкова итиэннэ Үлэ киһитэ бириэмийэ лауреата, сарсыардааҥҥы эрчиллиилэри ыытар инструктор Маргарита Куличкина. Бары ураты тиэхиникэни көрдөрдүлэр.

Дьокуускайдааҕы педагогическай колледж иккис кууруһун устудьуона Роберт Лыткин бэйэтэ физкультура учууталыгар үөрэнэр буолан сыллата сарсыардааҥҥы эрчиллиилэри көтүппэт. Кини бу сырыыга ордук Сардаана Трофимова эрчиллиилэрин сөбүлээбит.

Роберт Лыткин, Дьокуускайдааҕы педагогическай колледж 2 кууруһун устудьуона: «Саамай боростуой дьарык буолар, оскуолаҕа үөрэтэллэр уонна наһаа ыарахана суох. Мин санаабар киһи элбээн эрэр».

Кырдьык быйыл киһи биллэ элбээбит. Ону тэрийээччилэр бэлиэтииллэр. Маныаха оттон статистика да көрдөрөрүнэн, кэнники сылларга нэһилиэнньэ улахан аҥаара спордунан дьарыктанар буолбут.

Гаврил Мохначевский, СӨ спорт уонна физическэй култуура миниистирин бастакы солбуйааччыта: «Дьон-сэргэ элбии турар. Эдэр ыччаттан саҕалаан саастаахтарга дылы тиийэ. Бэйэтэ чэгиэн буоларыгар диэн сүүрэр киһи сүрдээх элбээтэ».

Оттон бу  эти-хааны чэбдигирдэр сарсыардааҥҥы тэрээһин спордунан дьарыктанааччылар ахсааннарын өссө элбэтэр. Дьон үлэлии барыан иннинэ кэлэн эттэрин-сииннэрин уһугуннараллар. Маныаха кинилэргэ күүс-көмө баай уопуттаах инструктордар буолаллар.

Маргарита Куличкина, СӨ спордун үтүөлээх үлэһитэ, "Үлэ киһитэ - 2025" бириэмийэ лауреата, сарсыардааҥҥы эрчиллиилэри ыытар инструктор: «Нэдиэлэҕэ үстэ сэрээккэ оҥороллоро булгуччу наада. Биһиги нэдиэлэҕэ биэстэ оҥоробут. Өрөбүллэргэ сынньанабыт. Син сылдьаллар».

2009 сылтан саҕаламмыт эти-хааны чэбдигирдэр тэрээһин бу сылга Улуу Кыайыы үбүлүөйдээх 80 сылыгар туһуланна. Эдэриттэн эмэнигэр тиийэ 700 кэриҥэ киһи кэлэн сарсыардаларын туһалаахтык атардылар.