"Олбуорунан ыллыыбыт" аахсыйа саҕаланна

Аҕа дойду Улуу сэриитин бэтэрээнэ Кирилл Павлов оҕолорун, сиэннэрин, хос сиэннэрин кытта олорор дьиэтин олбуоругар тахсан киниэхэ анаммыт кэнсиэри көрөр. Ырыаһыттар толоруулара Кирилл Егоровичка бииргэ сэриилэспит доҕотторун, этэрээтин хамандыырын санатара саарбаҕа суох. 80 сыл анараа өттүгэр ыам ыйын 9 күнүгэр Кыайыы туһунан сураҕы истээт, кинилэр эмиэ бу курдук, үөрүүлэриттэн ыллам ырыаны оройуттан туппуттара.

Кирил Павлов, Аҕа дойду Улуу сэриитин бэтэрээнэ: «Маннык бырааһынньык бэтэрээннэргэ оһуоба сыаналаах. Итинник бырааһынньык 1945 сыллаахха Сэбиэскэй сойуус кыайыытынан түмүктэммитэ. Биһиги салайааччыларбыт Коммунистическэй партия уонна Улуу Сталин кыайыыны тэрийбиттэрэ».

Кирилл Егорович оччолорго педагогическай училищеҕа үөрэнэ сылдьан 1944 сыллаахха фроҥҥа ыҥырыллан барбыта. Онон кини сэрии кэмигэр Саха сиригэр сатыылаабыт уот курааны, аас-туор олоҕу, онтон уоттаах сэриини бүтүннүү этинэн-хаанынан билбитэ. Ытык киһини эҕэрдэлии ыччат дьон тоҕуоруспут. Бу  Кыайыыны уһансыбыт дьоммутугар сүгүрүйүүбүт бэлиэтэ.

Үйэттэн ордук саастаах Валентина Ефремова сааскы ылааҥы күн дьиэтин айаҕар тахсан байыаннай ырыалары тэҥҥэ ылласта. Кини сүүһүнэн киһи олоҕун быыһаабыт байыаннай биэлсэр. Валентина Васильевна хорсун быһыы, күүстээх санаа тыыннаах туоһута.

Валентина Ефремова, Аҕа дойду Улуу сэриитин бэтэрээнэ: «Сылын аайы биһиги эҕэрдэлиибит Валентина Васильевнабытын. Биһи дьиэбит гимназияны кытта кэккэлэһэ турар. Оҕолорбут шефтэһэллэр, сылдьаллар, эҕэрдэлииллэр».

Кыайыы иһин махтал бэлиэтин биллэрэр, Улуу Кыайыы үгэһин тириэрдэр "Кыайыы түннүгэ" аахсыйа билигин хас биирдии дьиэҕэ үөрэх тэрилтэтигэр тэтимнээхтик барар. Дьокуускайдааҕы Классическай гимназия үөрэнээччилэрэ эйэ холуубун кырыйаллар.

Айаан Борисов, Дьокуускай куораттааҕы классическай гимназия үөрэнээччитэ: «Кыайыы күнүгэр арааһынай символлары кырыйа сылдьабыт».

Үтүө үгэскэ кубулуйбут аахсыйаҕа оскуола бары кылааһа кыттар. Алын сүһүөх үөрэнээччилэрэ орду хото кытталлар. 4 кылаастар номнуо түннүктэрин киэргэтэн, кыайыы күнүгэр ыллыахтаах ырыаларын чочуйаллар.

Милана Ишниязова, Дьокуускай куораттааҕы классическай гимназия үөрэнээччитэ: «Кыайыы күнүгэр бары кылааспытынан түннүктэри киэргэттибит».

"Олбуорунан ыллыыбыт" аахсыйа сылын аайы ыытыллар үтүө үгэс. Дьокуускайга быйыл 6 тэлгэһэҕэ бу курдук Аҕа дойду улуу сэриитин кыттыылаахтарын эҕэрдэлиэхтэрэ.