"Саюри" теплицаҕа буортулааччылары бэрэбиэркэлииллэр

Сыл хайа баҕар кэмигэр манна оҕуруот аһа эргиччи ас кутар. Биир быһыыга ортотунан 5 туонна помидор хомуллар. Үрдүк үүнүү биир сүрүн кистэлэҥэ - буортулааччыны кытта былааннаах үлэ. Ол чэрчитинэн Россельхознадзор иниспиэктэрдэрэ сыл аайы хас да көрүҥ үүнээйи үөнүгэр бэрэбиэркэ ыыталлар.

Ирина Степанова, Россельхознадзор Амур уобалаһынааҕы уонна Саха сиринээҕи салалтатын судаарыстыбаннай иниспиэктэрэ: "Саха сиригэр харантыыннаах үүнээйи туругун былааныгар олоҕуран бэрэбиэркэ ыытабыт. Бу угаайыларбытын арҕааҥҥы трипс уонна томат көйүүрэ диэҥҥэ ыйаатыбыт. Бу үөннэр атын регионнарга суохтар". 

Олус кыра кээмэйдээх, киһи хараҕар тута быраҕыллыбат буортулааччылары бэрэбиэркэлииргэ, бу курдук икки өттүнэн силимнээх анал угаайылар олус туһалаахтар. Үөннэри тардар сыттаах, ол иһин баар буоллахтарына хайаан да кэлэн сысталлар. Иниспиэктэрдэр хаһаайыстыба бары үүнээйитин сыныйаллар. Бастаан тас көстүүтүн көрөллөр. Оннооҕор  тропик үүнээйитэ папайа кытта бэрэбиэркэлэнэр.

Надежда Винокурова,  Россельхознадзор Амур уобалаһынааҕы уонна Саха сиринээҕи салалтатын судаарыстыбаннай иниспиэктэрэ: "Манна араас үөннэр сүүрүөхтэрин сөп. Эбэтэр трипс сиэбит буоллаҕына тэһэҕэстээх буолар. Көрдөххө үчүчгэй курдук, сибэккилэнэр, бу сороҕо ас биэрэн эрэр. Туруктара үчүгэй".  

Биир маннык угаайы 100 кыбадыраатынай миэтэрэҕэ сөп буолар. Саха сирин уопсай көрдөрүүтүн ылан көрөр буоллахха,  билиҥҥитэ бу ыйыллар үөннэр суохтар. Эрдэ баар буола сылдьыбыт. Ону 5 сыллааҕыта суох оҥорбуттар. Маныаха хаһаайыстыбалар бэйэлэрин өттүттэн куруутун көрүнэ сылдьаллара, туһааннаах үлэни ыыталлара туһалыыр. Саюрилар бу курдук араҕас өҥнөөх уһун лиэнтэлэри ордук сөбүлээн туһаналлар. 

Афанасий Федотов, агроном: "Сииктээх сиргэ син биир сиик үөнэ баар буолар. Олору тутабыт. Ити сэргэ араас буортулааччылары кытта үлэ ыытабыт. Теплица саҥа олородо эрэ бу үлэ саҕаланар”.

Ирбэт тоҥҥо сылы эргиччи үүнэр теплица биир бастакынан бэрэбиэркэлэннэ. Арай буортулааччы баара билиннэҕинэ өрөспүүбүлүкэҕэ харантыын биллэриллэр. Итиэннэ үүнээйилэри эмтээһин саҕаланар.

"Бу анал угаайылар икки нэдиэлэ устата ыйанан тураллар. Ол кэннэ иниспиэктэрдэр төптөрү хомуйан ылан, салгыы Иркутскайга лабораторияҕа чинчийиигэ ыыталлар", - Мария Дмитриева, корреспондент.